WARA'AMI 82 - Ya/abtór hho' 1977

Mungú a Baalusmoó Úr

(Wara'amtá Asafu)

¹ Mungú aa sihhiít baraá tla/ángw boohharós i alé, i sakwasleemár tleehh baraá tla/eeraá muruudá' taa tleéhh hariímár Mungú ló' wa ale,

² “Ay xaylá sakwasleemár hara/uuntsa ka tlehhaahhita', nee axweesanoó múk tlakuuse kuwa ya/a/aanda'?

³ Narkuute nee panaay sakwasleemár ganaa' ti tlehhe'. Liitlakuuse nee múk gaa wásl alee/iisaak.

⁴ Liitlakuuse nee múk alee/isoó slaá' tu/aak, tu/aak baraá dabaá tlakuuseero.”

⁵ Ka xuiiká sleeme ka tsatsaahhanká, tan baraá qwanáy wa hoot. Iihhafiirír yaamu sleémeero in diingít, asma hotaá ganaa'á' i kahhiyá' baraá yaamuuwo.

⁶ Aníng ana oó', “Kuungá' a mungui, nee a na/'aá Mungú kudá' Gawtí dirií' kuungá' sleémeero.

⁷ Ala tam adoorihe kuungá' a qatlá', adór múk hatlá' ir qatli, slafingwhúng i alhhe'eesuut adór slafíngw geeraharusmo ir alhhe'eesuuti baraá waawuti'iimarose.”

⁸ Mungú, sihhiít, yaamu sakwasleemuteek, asma kuúng xoordu sleémeero a kók.