WARA'AMI 80 - Ya/abtór hho' 1977

Firo as Ba/amár Xooro

(Lamabu'úngw Asafu. Wara'ami)

¹ Kuúngusuú de'emusmoó múk Israeli, iia qaaseek, múk Yosefu geeraharahareek adór daqooroó bee/aangw. Kuúngudá' aga gawtí iwit dír malaykeero, xirfuuwók gwa/atiseek.

² /Uuruuwók laqaameek dír geeraá Efraimu nee Benyamini nee Manase, qwaláng, atén ti ba/amis.

³ Xáy, Mungú, atén ti malé /uuruú i ki/is, nee atén ti ilaa'aan, daqaní atén a ba/amán.

⁴ Xáy AÁKO, Mungú Aleesleemusmo, ay xaylá firór mukók kas qa/iimit?

⁵ Muruú /aymár taa hanís a hhirhheeri, nee gár kira wahás a hhirhheeraá yaariir. Mukók gár kura qeér a hhirhheeri.

⁶ Inslaawayrén una gilár eér asma atén, nee wakuuseerén tin waaqaseseén.

⁷ Xáy, Mungú Aleesleemusmo, atén ti male /uuruú i qas, atén ti ilaa'aan daqaní atén a ba/amán.

⁸ Msabiíbuú Misrír daáhh nguna húp, xoordu kiri gús kway dahás.

⁹ Sla/a ana fíts, inós dee/aruuwós guna sihha hhe'eés yaamu giri hatsiís.

¹⁰ Tloom'i kina tuuntuúk ar mahhatuuwós, haleemiiwós a adór mieresír Mungú.

¹¹ Inós haleemiiwós gina ifiís ay baraá tlawi, nee harma/oorós ay didár yaae i diri'.

¹² Asma milá koo/irós masa fe/é', mukdá' sleémeero waraáhh ar baraá loohi guri bu'ún?

¹³ Baynaá sla/a nguri hhitiné', nee makaá sla/a nguna tlu'uné'.

¹⁴ Aá Mungú Aleesleemusmo, un harhhehhe'eemiisaán, ki/áng, qaytsiít gawtá wa aleeró, msabiíbuuwí i hardaheek kuwa amohhe'es.

¹⁵ Nee hatliituudá' taa hátl ar dakók oo doó /iyáy, nee yaeemidá' kuúng taa tsawát kawa amohhe'eemis as iwa gawduur.

¹⁶ Muu gaa tsaát gari daá/ ar asla, kuúng inooín hhaameeseek.

¹⁷ Mukók kudá' taa tsawát de'eemeek, xoororók tidá' taa amohhe'eemís as kuúng, /uurií haniseek.

¹⁸ Ala u baloó geexawanaaká as tawa alií ki/aan, ti slafíngwí hanis, daqaní atén umuuwók u ateetaán.

¹⁹ Aá AAKOÓ MUNGÚ Aleesleemusmo, atén ti malé /uuruú i ki/is, ti ilaa'aan, daqaní atén a ba/amán.