WARA'AMI 79 - Ya/abtór hho' 1977

Firo as Xooro kawa Gweeri

(Wara'amtá Asafu)

¹ Aá Mungú, múk kuúng u xuaaká yaamuuwók gaa i haratláy. Do'ók oo hhoohhoó' ngwa tligár ayé', nee gixsár Yerusalemu ngiri sluhhuyé'.

² Tuaá múk sagadiyuseerók kiri tawoó geexáy, gwares giri /aáy, slaqwaá mukók kudá' hhohhó' a /aymár bahu.

³ Tseerduuín kina ku'uús adór ma'aay, gixsár Yerusalemu ngiri harweeriyé' bihhe sleémeero, tam heé tu'u gi foliít i kaahh.

⁴ Aga tli/aán dír xoordaá inslaawaywo. Múk inslaawayrén tin waaqaseesén nee tin niqín.

⁵ Aá AAKOÓ MUNGÚ, buhhtaawók ki alhhe'eesay wásle? Ay xaylá buhhtaawók iwa ohahiina' adór asltá wa ale?

⁶ Buhhtaawo tsinumiít gawaá daanduú kudá' kuúng u xuaaká, nee waawuti'iima sleémeero tidá' umuuwók gu ateetimaaká.

⁷ Asma inooín múk Yakobo kwaa tsuú/, nee dír hotaangós kaa hhitiima hhe'eés.

⁸ Miti sakwasleemuutaar as dakuusár xwayliiteérén. Gurtleemuwoge ti alee'eer ar gaanslaay, asma atén taa kángw kilá' wa hara/uuntsín.

⁹ Na'ás Mungú, ba/amusmoorén, atén ti ba/amis as xirfuú umuuwók, tlakweemarén gurtlaweek ar umuuwók.

¹⁰ A gár milá múk xoordu tiwa babay, “Mungúhúng kwisíng i amá ala?” Ka arané' ló' adór múk xoordu kur li/áy bui, as tsu/utár sagadiyuuseerók.

¹¹ /Aa/aá kuká' taa tsegiít u i hardahiye', ar /uuruuwók oo ure ba/amiiseek, kudá' sakwasleemar'ín taa tsaát kiwa tsu/i.

¹² Aá Aakoó Mungú, xoordukaá digimuú inslaawaay awa kuúng u /ooslislimá', li/aay gawaaín ti bu' sagaá wa faanqw.

¹³ Daqaní mukók kuduú adór daqtá bee/aangw ar baraá qawtani, kuúng u sluufís daqisleém, xirfuuwók un alki/iitaán baraá qari sleémeero.