WARA'AMI 77 - Ya/abtór hho' 1977

Gurkwa/asa Qoomár Slahh'amuwo

(Wara'amtá Asafu)

¹ Mungú un i /aa/amiím ar afór ur, un i /aa/amiím as kahhó' inós aníng iwa axaasi.

² Deelór slahh'amayer'eene Aako una leeleéhh, dabaaeé' ina gáwtí tleés xweerawo as nguwa fiririim. Muunaáeé' gurkwa/asa gari sií'.

³ Qoomár niwa Mungú inslaslaw, nari amoqwaár. Qoomár nguwa aldakuut, nari mune sií'.

⁴ Hhamhhamaaeé' ina ót as mawa gufiís, ana slahhaá' tam ilawatsa ngay harslaaqaát.

⁵ Kángw bál qaro una aldakuút, kureeraá qár awa naa waarahhiye' ina inslasláw.

⁶ Xweeraawo daa'angw'eé' un inslasláw, an baraá muunaáeé' i axweés, nari kilooeé' daawimiít.

⁷ Xáy, Aako ti kwáhhi ay alhhe'eesay wasle? Ti male gurhhooár i tleehhikáhe?

⁸ Sla'ariirók ar warqawaaká aa fáki ay alhhe'eesay wasle? Al'axweesantók tidár qari sleémeero aa warqeéri?

⁹ Mungú gurhhooarós gaa gunqareési? Xáy ar buhhtaawose gurtleemu gwa báqi?

¹⁰ Nari oó', “Gár aníng i daawitamiis a tí, Mungú úr /uuruuwós gwa hingeés diirene.”

¹¹ Tlehhma'aá AAKOÓ MUNGÚ in aldaákw, waa/oo/amoorók ar qár an iinsláw.

¹² Gadiyeérók sleémeero an aldaákw sleeme, kángw tlehhmi'iiwók un guruú i axweés.

¹³ Mungú, lohduuwók ki hhohho', a heemá Mungú úr oo adór kuúng?

¹⁴ Kuúng an Mungú waa/oo/amór tlehhiít, aleesleemuuwók una geehhooatís tla/eeraá xoorduuwo.

¹⁵ Ar dakók kudá' /uuruú kooma mukók uga ba/amís, na/'aá Yakobo nee awa Yosefu.

¹⁶ Mungú, kuúng ma'aay una ariyé', ma'aydá' ugwa ariyé' nari da'ayuutiyé', iloodaá ma'aay nari daaraxaatiyé'.

¹⁷ Hunkáy ma'aay ngay ku'uús, doori sleeme nay kududuuhutiyé', mankaro iri war'eeliín bihhe sleémeero.

¹⁸ Kwararaa/a i harweeririín, maankari yaamu gay tsaa'ás, yaamu nay daaraxatiyé' nari diingitiyé'.

¹⁹ Irwaarók a baraá tlawtár waaráhh, nee loohirók ina waaráhh ar baraá ma'aá yaariir, ala digiruuwók kwa ariiká.

²⁰ Mukók una geerahát adór daqtá bee/ángw wa ale, ar dákw Musa nee Haruni.