WARA'AMI 75 - Ya/abtór hho' 1977

Mungú Kwasleema ga Tsaat

(Wara'amtá Asafu. Daa'aangw)

¹ Mungú, atén kuúng un xirfayeemisaán nee un sluufimisaán. Asma kuúng tu tseéw dír kudá' tlehhmi'iiwók awa waa/oo/amo ngi alki/iitá'.

² Afiqoomaadá' aníng naa oó' bira xeér, aníng sakwasleema a tleéhh ar gan'amu.

³ Tam yaamu nee muruú baraadí dirií' sleémeero i dingitiye'. Aníng kilooeé' iihhafiirir'ín an gawdeés.

⁴ Kudá' naa daara/uutiye' ina báw, “Ma daara/aamaara'.” Nee tlakuuse ngay báw, “Xoongirhúng ma tawo tleemisaara'.”

⁵ Miti kiloohúng xirfayeemisaara', sleeme ma axweesara' ar sagagawdu.

⁶ Asma xirif i da/aá dahhiiká laqaá /uuwaá dahhiiká, tam i baraá xaanxoó dahhiiká, laqaá i baraá tlom'aá dahhiiká.

⁷ Ala Mungú an kudá' kwasleema ga tsaát, heewí gu niinawees nee kuqá' gu xirfayees.

⁸ Asma AAKOÓ MUNGÚ buhhtaawo aa qa/iít adór qware/amoó difaáiro aa haats, ar taa aleedoók ar muruú tsu/uút, inós gari wahaas ar múk tlákw ay dír ngay tsaanqasiya'.

⁹ Ala aníng tlehhmi'iiwók i alki/iít daqisleém, Mungú Yakobo un xirfuú i daá'.

¹⁰ Mungú ina oó', “Múk tlákw un aleesleemu hayóh, ala kudá' hota ganaa'á' in aleesleemuú i haniís.”