WARA'AMI 74 - Ya/abtór hho' 1977

Tsuunqumis as Doó Mungú kuwa Feé/

(Wara'amtá intsaahhatimis ar Asafu)

¹ Aakoó Mungú, asma waáy, atén mista sí' ay alhhe'eesáy wasle? Ahaá, buhhtaawók mis xaraasliyá' dír bee/ángw qawtantoge?

² Inslaweek mukdá' taa iimír aáng wa tsawát, xooroodá' taa ba/amís as tawa aalirók. Inslaweek tloomár Sayuni, tidá' taa dír hotawók tléhh.

³ Hi'iimiít baraá taanguuká' wa ale, wakuuseerén umuú garo gaa hhitiín baraá Do'ók oo hhoohhooe.

⁴ Inooín i tsimaahhusiyá' baraá Do'ók wa ale, arba/ati nga slayé', i durbiibiná' baraadá' wa ale.

⁵ Inooín an adór múk tsabuín gaa oh, kudá' xaa'aá darmuú tlaqá'.

⁶ Afkuú Do'ók oo hhoohhoó' ngwa fee/iyé', ar tsabuín nee yundeemoín.

⁷ Do'ók oo hhoohhoó' ngwa fee/iyé', nee ngway da/iyé' didaádá' kuúng tuwa ilaiwawa/i ngay tligár ayé'.

⁸ Nina al'axweesiyé', tawa kaahi, i qwareesaán sleémeero. Maraá Mungú kuwa sluufimiisi sleémeero baraá ayko ka daá/.

⁹ Layár ta ara'araán i káhh, laqaá aarusmo. Tam alhhe'eesoó tí heé gu xuú' i kaahh.

¹⁰ Aá Mungú, wakuuse u niqaaqiin ay xaylá? Xáy, umuuwók aqo kun /ooslaslína ay alhhe'eesay wasle?

¹¹ Ahaá bareé dakók oo /uuruú koóm ugwa ar kí/, dakók tleeseek gawaaíní ale.

¹² Ala kuúng, Mungú, an waawutmooeé' oo iimír aáng, muruú yaariír oo ba/ama ugwa tléhh baraá yaamuwo.

¹³ Kuúng tlawi ana tla/aa feehhís ar /uuruuwók, sagér dayshedá' uren ar baraá tlawi ana naasuúr.

¹⁴ Kuúng sagér Lewiatani ana naasuúr, as tawa muruú /aymár múk baraá xaanxaay.

¹⁵ Kuúng tsiinqa nee yau ina duxuún, kuúng yaudá' uren ina kahamís.

¹⁶ Tlaatla/aangw a kók nee xweera a kók, kuúng slahhaangw nee tsee/amá ina dir'íni qás.

¹⁷ Kuúng digeemi sleémeero awa yaamu ina qás, kuúng age nee buhaarewo ina tléhh.

¹⁸ Ala AAKOÓ MUNGÚ, tí inslaweek, wakuuse i kuúng niqimís, múk daktana umuuwók gu waaqaqaa'.

¹⁹ Hhintluú hhookirók mu dír makito'ór xaraáslí haniisaar, mukók kudá' ta slahhaeemiís mu gunqareesaar!

²⁰ Alqadoorók inslaweek tidá' taa tléhh as atén. asma /awaa/awiingw aa tlaáhh baraá lohdaá iirakw awa giwa'a. Yaamu naa hatsiyé' /aytaro.

²¹ Múk ta ngwanjin mu mawaar as kuwa murekeesi, heé narkutmo nee oo dawa kaahaár umuuwók ngu xirfeesiye'!

²² Mungú, kuúng sihhiít, ti aleekala/ kilók ale! Inslaweek adór tur niqin nee daktana tlaatla/aangw sleémeero.

²³ Afór wakuuseerók ma gunqareesaar, lo'lo'oó umuú deelo oo múk kuúng u tlaampa'aamiís.