WARA'AMI 73 - Ya/abtór hho' 1977

KITAÁBUÚ TÁM ( War 73—89 ) Gan'amuú Mungú

(Wara'amtá Asafu)

¹ Ar ló', Mungú ku hhoó' dír Israeliwo, dír kudá' muner'ín hhohhoe.

² Ala án geerawo taa lak gee/aásl, aga lak huú' baraá haratlintaaoro.

³ Asma mukdá' tlákw ti kilooín xirfayeemisá', aníng ngiwa ár kiwa diihhoo' aníng gura' iri óh.

⁴ Asma i slahh'amaayér kon'aaká, nee ki slaqo hhó'.

⁵ Slahh'amaaye ka slayká adór múk hatlá' wa ale, slám ki muxiiká adoodár múk hatlá' wa ale,

⁶ Daara/aango iwa hiley guir, adór heé ta parootuús ar kwaslu, inooín a ngwanjuuse, dir'ine ngwanji a adór tsitaay.

⁷ Tlakweema in baraaín wa ti'iimitiyá'. Inslawoó tlákw aa baalín baraá muner'ine.

⁸ Muu ngun niqmisiyá' nee ngu muruú tlákwí kaahiyá', i daara/aná' i adór warqeemisiyá' ar muu ngur ngwanjina'.

⁹ Afer'ine i Mungú /ooslisliná', ar axweesaanay'ine i waahhaminá' iwa kaahiya', “Yaamu a koorén.”

¹⁰ Gawaá adoorihe tam múk Mungú ngun afaa/aasliyá', ador'ín tidá' ngay waatlakweesiyá', asma gár tlaakw ar ta tsatsahhan i káhh.

¹¹ Inooín ta kaahi, “Mungú mingir tsaahh, sagalooa i deéro dír ínsuuquú gawto?”

¹² Xueek adoorí an adór múk tlákw i dirii'i, as kiwa diihhoén deelo sleémeero, in ak daqaari'iimitiyá'.

¹³ Nari oó', “Muunaáeé' una tawo hhoohhoeés, dabaá tlakw ina tawo tleehhiiká.

¹⁴ Tlaatla/aangw sleémeero tina muúx, nee tina slahh'eemiís umuúqo matlatleero.”

¹⁵ Geera axweesanaywí bura alki/ituú áw, laatí na/'iiwók geera iga al/aáy.

¹⁶ Ala qoomár aníng muruuwí nguwa aldaákw as nguwa tsaahh, naxés iri gawdúy dir'eene.

¹⁷ Ay bál niwa dáh dír hhoohhoo' ar Mungú, aníng alhhe'eesay'ín nguri tsaáhh.

¹⁸ Looeemaawo, kuúng inooín i qás dír nikitsá koom, kiri dáhh nari hhaná'.

¹⁹ Adoorí a adoomá kira hhaameés ar wa'aá wák, kina suquúy ar adór de'e tlaqa.

²⁰ Aáko, kuúng bara sihhít inooín i gaanslár qwaariyá', asma inooín in qwaariyá' adór tlataá wa ale.

²¹ Qoomár aníng niwa gurhhaamuút, muunaáeé' iwa slahhaá',

²² aníng nari adór daktani tleehhiít, /aymuú ni xuu' i kaahh, aníng a adór makito'o dír geeraawoge.

²³ Ala aníng a dinkwa nee kuúng daqisleém, dakw'eé' oo doó /iyáy una ót.

²⁴ In geeraharahát ar gurbu'uungók, aluuwo iri ilaót baraá xirfuuwók.

²⁵ Heé hatlá' ni koom i kaahh gawaá dooriwo, tam baraá yaamuuwo gár i sla'atis i káhh, aqo har kuúng.

²⁶ Slaqwte'eé' nee muunaáeé' i /aaruyá'. Ala Mungú a /uuruú muunaáeé', nee an kwe'eé' ay alhhe'eesay wasle.

²⁷ Asma mukdá' taa paraatliye' nee kuúng ta qwaar, kudá' sleémeero inkihhimuú kooma'aaká diroge in qwaarés.

²⁸ Ala dir'eene Mungú nguwa i tseewúw a gár ló' wa hhoo', AAKOÓ MUNGÚ a dír guway'eé'. Aníng tlehhmi'iiwók sleémeero i lamabu'uúm.