WARA'AMI 71 - Ya/abtór hho' 1977

Firór Aakoó aa Din

¹ Án naa amoorók i goów, AAKOÓ MUNGÚ, án mitiwa baloó mureekeés.

² Ar gan'amuuwoge án tu/áng, nee án /iisáng, án iiárií qaasáng, nee ba/amiisáng.

³ Kuúng dir'eene masók a tlaa/ár ni gogoow nee baqmor'eé', nee adór koo/ír gawit ar aníng i ba/amis, asma an tlaa/ar'ee' nee baqmor'eé'.

⁴ Mungúeé', án tu/áng, dabaá heé xaraásl nee heé malgusmowo tu/áng.

⁵ Asma kuúng AAKOÓ MUNGÚ a harahhifor'eé', kuúng una haratlintií' iimír masoombi'iimar'eene.

⁶ Án kuúng ugwa haratlintií' iimír tiwa laqwaál, kuúng an kudá' aníng iga dux baraá guruú aayír'eé' wa ale, án kuúng u xirfayeemiís deelo sleémeero.

⁷ Aníng adór ni dirii' a adór gár murewasl dír múk yaariire, ala kuúng an dír gawit ar guway'eé'.

⁸ Afkwe'eé' i haats xirfuuwoge, nee xirfuuwók un waahhamiím tlaatla/aangw sleémeero.

⁹ Aníng mi kwahhaar qoomár bar aga diím, /uuruueé' bira /aarúy, aníng mi geexawaar.

¹⁰ Asma wakuuser'eé' aníng ti daanda axwees, kudá' slafingw'eé' mitsiimá' ta kilooín axwees.

¹¹ Ta kaahi, Mungú gwa geexáy, eeharaak, oohaak, asma heé gu tuú/ i kaahh.

¹² Mungú, kuúng masók tu saweeká dír aninge, Mungúeé', gaansluutáng án alee/isáng.

¹³ Kudá' aníng tlampa'aamisá' ki murekeesi, nee ki hhaameesi kudá' aníng i gár tlaakw i sla'á', ki niqin nee ki waaqaai.

¹⁴ Ala aníng kuúng un harahhiíf umuú qoomaaro, aníng an kumiít xirfuuwók sleémeero nguwa doogiit.

¹⁵ Aníng afku'eene tlehhmi'iiwók kudá' ganaa'á' in alki/iít, tlehhmi'iiwók kudaá ba/ama in dír múkwí ooiím deelo sleémeero, asma ki ló'wa yaariir, faarooro i aleeslawaaká.

¹⁶ AAKOÓ MUNGÚEÉ', aníng tlehhmi'iiwók awa uren in alki/iít, gan'amuuwók kilós un xirfayeés.

¹⁷ Kuúng Mungú, kuúng aníng ina intsaahhatimís iimír án tawa masoomo, tam ay hamí aníng tlehhmi'iiwók awa waa/oo/amo in alki/iít.

¹⁸ Tam aníng aga diimi, tam al/awtantá kooma, kuúng Mungú, án mi geexawaar, ay dír /uuruuwók nee uraywoók ngway oo' dír qari sleémeero ar aluú wa hardah.

¹⁹ Aá Mungú, aleesleemuuwók nee gan'amuuwók ina gáwtí hardáh ay doori, xáy Mungú, kuúnguudá' muruú urén ugwa tlehh, heé adór kuúng a heemá?

²⁰ Kuúng iga slahha'amuú yaariír i hanís ala i malé slafís iri /uuruú i dók, iri afkuú bohóngw wa ki/ís.

²¹ Kuúng ilaiwa/amer'eé' ngin dók, nin amor'eé' i kí/ iri gurkwa/ás.

²² Aníng kuúng un xirfayeemiís, ar seése as inkihhimuuwók, kuúng Mungúeé', án kuúng un i daá' ar gidaandoori, kuúnguudá' hhoohhoó' oo Israeli.

²³ Aníng a qwalaalaá/ ló' wa ale bur i daá'. Muunaáeé' sleeme i qwalalaa/ asma aníng iga ba/amís.

²⁴ Aníng gan'amuuwók un alki/iít tlaatla/aangw sleémeero, asma kaa mureekeés nee kiri niqmís kudá' aníng i gár tlaákw i sla'á'.