WARA'AMI 69 - Ya/abtór hho' 1977

Firo as Alee/isaay

(Wara'amtá Daudi)

¹ Xáy Mungú, án ba/amisáng, asma ma'aay iga gu/iyé' ay isa.

² A /ee/etiím baraá buunqár yaariír i ale, dír sihhtano iwa baloó ya/aandaaká, aga hardáh baraá iltá ma'aay, gwandú ma'aay in ar tlatláy.

³ Aga slaaqaát /aa/eewo, hheehhar'eé' aa kát, Mungúeé' una damraaraám, ilaaeé' nay maa/uutiyé'.

⁴ Múk aníng i tawo ahhiít ku yaariír tam se'éngw sagw'eé' ba/a. Múk aníng i gaasár wa slaá' i ló'wa /uuruú kón, kudá' aníng hara/uuntsimá' ar lama. “Gár naa fiisiikahe gár ni buu'?”

⁵ Mungú, kuúng daktu'uumar'eé' a xú', tam tlakweemaaeé' kaa lu/iiká diroge.

⁶ Awa kuúng daamaraamá' mikiwa mureekeemiís as aníng, Aáko, Mungú Aleesleemusmo, kudá' kuúng harahhifá' mikiwa niqmís as aníng, aá Mungú Israeli.

⁷ Tina niqimís as kuúng, alsi'imuwo qayta ngari naá/.

⁸ Ana dahaaymo tleehhiít dír hhae'eene, daa'awte'eé' i tsatsahhandaaká.

⁹ Sla'aarír do'ók i hamís baraaeene, tí slafingw'eé' gu ar ti'ít, nee niqaydá' kuúng tur niqimisi aníng iga sláy.

¹⁰ Aníng tiwa slahh'eemiís ar gwaawito, muu ina niqimiís.

¹¹ Gunyadu ngiwa tsiít as tsuunqusmo, tari gár tar axweesi dir'ine.

¹² Muu baraá lohuwo aníng in tawo daanda axwees, nee múk oonituuse aníng in niqín ar daa'angw'ín.

¹³ AAKOÓ MUNGÚ, aníng un fiririím, Mungú, qoomadá' u sla'atimisa, án mu/aywatsáng ar sla'aarirók tidá' warqawaaká, ar inkihhimuwoge aníng tu/áng.

¹⁴ Tu/áng mawa /eét baraá buunqár i ale, /iisáng dír dabaá wakuuser'eene, nee mawa /eét baraá tsal'ír ma'aay.

¹⁵ Duxér ma'aay aníng miwa hayót, tam iloodaá tlawi aníng miwa gu/iyé'. Gwa'ara sleeme pa/aseek aníng miwa ar tleér.

¹⁶ AAKOÓ MUNGÚ, án mu/aywatsáng, asma sla'aarirók ar warqawaaká a gár hhoo', ar gurtleemuwók kudá' yaariire án i qaytáng.

¹⁷ Án mi alaá xu'usaar, anuú sagadiyusmoowók, asma aníng a baraá slahh'amuú úr, adaá mu/aywatsáng ar gaanslaay.

¹⁸ Aníng haratseewuwáng, tu/áng. Gweeráng baraá dabaá wakuuser'eene.

¹⁹ Kuúng a xú' adór tir niqimisi, nee alsi'imu nee mure waslay'eene. Wakuuser'eé' sleémeero a xú'.

²⁰ Aga diqay tsatiít asma niqaay, nari mune sií', gurtleemu una daamaraám ala i kaahh, nee múk i gurkwa/ás una damraaraám, ala tam heé naa hardah i kaahh.

²¹ Qoomár niwa qwariít, qara nguna haniisiyé' tawa muruú /aymar'eé'. Qoomár án niwa waxiít tina wahaás ar gár qarqaar.

²² Masók muruú /aymár taa tleéhh as deelór ur ar boo/aay, gin uhín adór tsir/o naqfí ngir ohahiin.

²³ Daandeemooín i koongagoiye' ay alhhe'eesoó slafingw'ín.

²⁴ Buhhtaawo daa/atúw dir'íni alé, qa/iít buhhtawo xaraasleemawók ngi slaye'.

²⁵ Dír hotaarir'ín i muu wasles, maray'ín mikiwa baloó hoót.

²⁶ Asma heedaadá' kuúng taa múx inooín ngun slahh'eemisiyá', kudá' kuúng taa inkahhi'ií qás, inooín ngun iinkaahhamisiyá'.

²⁷ Muxtaaro altu/eek as umuúqo tlakweemaá naa tleehhii'i, tam ado gaalá gurtleemuuwók munguwa slayé'.

²⁸ Xaa fiitseek baraá kitaábuú slafiingo, tam mikiwa gooín dinkwa nee múk hotaa ganaá.

²⁹ Anuú slahhahhaá' nee oo aga mune sii', Mungú, án /uurií qaasáng nee ba/amisáng!

³⁰ Umuú Mungú u xirfayeemiís ar daa'aangw, aníng Mungú u diidi'iimiís ar sluufaay.

³¹ Gaarí AAKOÓ MUNGÚ gun sla'atís ta awuú karaamaro, laqaá tam yaqaambuú úr, oo /amatluú koóm nee ta/anta/amawo kuwa sluufáy wá duxuna.

³² Awa taa baraamaanuús adoorí bir ngaa ariyé' ta qwalaá/, kuungaásingá' Mungú leelehhiitá', tunduri gurkwa/as.

³³ Asma AAKOÓ MUNGÚ kudá' liitlakwen gi iiárií qamín, mukós kudá' taa tseék gu gunqaresiiká.

³⁴ Doori nee yaamu ngu xirfayeemisiye', tlawi nee umuú gár baraawós wa hoota ngu xirfayeemisiye'.

³⁵ Asma Mungú gixsár Sayuni ga ba/amis, nee gixsadaá Yuda gi malé tleehh, nee sagadiyuuseerós iri baraadá' wa hót, yaamuudá' tari kooín.

³⁶ Xwaylár sagadiyuuseerós yaamudá' gi ál, kudá' inós ngu sla'á' tari baraadá' wa hoot.