WARA'AMI 68 - Ya/abtór hho' 1977

Daa'ángw Xooro oo Arba/ati

(Wara'amtá Daudi)

¹ Mungú ni tláy, wakuuseerós in diyaaya/át, inooínaadá' ngu ahhiitá' ngu ilagoowiyá'.

² Adoodár quui kar fukuku'uumisi an adoodá' inooín kir guusi, adór boohhayaangw ir weeqaweeqi dír bihhaá aslto, an adoodá' tlakuuse ir qwat geeraá Munguhe.

³ Ala múk hotaa ganaá' tan qwalalaa/, tan baraa/ geeraá Munguhe, tay tsimaahh ar qwala/.

⁴ Mungú i daa'aak, umuuwós xirfayeemisaak, loohír waarahhama geeraawós ti tlehhe', inós a kudá' baraá darmúr waaraáhh. Umuuwós a AAKOÓ MUNGÚ, baraa/é' dír geeraawós wa ale!

⁵ Mungú baraá do'ós kudá' hhoohhooe an baabuú panaay nee har'ohusmoó kwaeeli.

⁶ Mungú kudá' dewawa'á' gin dír hotáy sláy, awa taa tsegiít gin gweer tawa iwiwiti ar amohhooa. Ala awa naa dee/aanutiye' tan iwiwiit baraá yaamaá kaahaár wa ale.

⁷ Xáy Mungú, qoomár tawa ti'ít dír geeraá mukók, tawa waarahh ar baraá darma,

⁸ yaamu nina daaraxaatiyé', tluuwaay iri tluúw gawaá doorií wa ale, as hardahamuú Mungú kuduú tloomár Sinai.

⁹ Mungú, kuúng tluuwoó yaariír nguna baraá yaamií hanís, yaamuuwók niwa slaaqatiyé' kuúng ina /uuruú /abén i hanís.

¹⁰ Xooroorók hotangw'ín guna baraadá' wa sleér. Mungú, kuúng kudaá liitlakuuse ina qeér ar hhooeemaawók.

¹¹ Aako axweesantós gana oó', /ameenár yaariir ya/abtór hho' gari ilaharmís.

¹² Waawituú slaqwaruuse in gwagoow, /ameena maraywo maraando gan qasmís.

¹³ Ala tam muu bahh'alé ta áykwí meeti deeloodár slaqwararo, ala murslaaqatuduú hhooki oo hhampe'eeriwós taa tleéhh ar sahaábu, i gwa/aat.

¹⁴ Qoomár Mungú Aleesleemusmo waawitá nguwa diyayaá/ amorqí alé, fadaá muu nina suwahhamiitiyé' adór tluuwoó tlaa/e ina tluúw gawaá tloomár Salmoni.

¹⁵ Aá tloomár Mungú, tloomár Bashani, kiíng a tloomár tleer ar tsitseeno yaariir, tloomár Bashani.

¹⁶ Aá tloomár tleer ar tsitseeno yaariir, kiíng mas tloomár AAKOÓ MUNGÚ ga/eér ar da/i, tidá' inós aa tsawaár hotaangós wa ale ay alhhe'eesay wasle?

¹⁷ Gaardaá Mungú i /uuruú koná', ki ló'wa yaariir. Faaror'ín a kumér kúm. Aakoó Mungú nina Sinaír wa tláy, ay dirós tidá' hhoohhoo'.

¹⁸ Kuúng aga gáwtí tsa/aán, múk yaariír ugwa maraandór wa húp. Qeemu ugwa sleér dír múk wa ale, eeít, tam mukdá' aa dee/aanuut ugwa qáy sleeme, AAKOÓ MUNGÚ i tla/angw'ín wá hoot.

¹⁹ Aako i xirfuuti, kudá' umuúqo deélooro huwaarén ga loohiís, Mungú an ba/amarén.

²⁰ Mungú diirene a Mungú ba/amiimís. AAKOÓ MUNGÚ kilós an kudá' atén ti ba/amís baraá gwa'araro.

²¹ Ala Mungú sagér wakuuseerós ga suwatsaat, nee sagér múk tlakweemár hotaatiím ga naasúy.

²² Aako ina oó', “Inooín ngin iimír Bashanír wa ki/ís. In ki/ís iimír baraá tla/ángw iltá wa ale.

²³ As kahhó' ya'aawók i hamátl baraá tseere, as kahhó' seeaweerók tseerdudaá wakuuseerók ngiwa naatsiin ay dír ni aaxiya'.”

²⁴ Mungú, muu kuúng ugwa ár nee mukók tawa al bar/a', kuúng Mungúeé', waawutmooeé', ta ár nee muu tawa tsa/aanda' ay dirók tidá' hhoohhoo'.

²⁵ Daauuse i hháw geera, múk gidaandoori i hháw alu, /amatlitér mataárír slahhaam i baraá tla/aangw.

²⁶ “Mungú diidi'iimisaak baraá boo/oó ure, AAKOÓ MUNGÚ xirfayeemisaak, kuungá' sleémeero awa xwaylár Israeli!”

²⁷ Benyamini a tlahhoó niiná in giirín, aluuwós geeraharuusér hhay Yuda nee muk'ín, aluudá' tari geeraharuusér Sebuloni nee ar Naftali.

²⁸ Mungú, aleesleemuwók kudá' úr laqaameek, Mungú, /uuruuwók kudá' tar gadiyus as atén laqaameek.

²⁹ Waawitá u qeemií huuw, as Do'ók oo hhoohhoó' oo Yerusalemu.

³⁰ Geeraharuusér xoordaá hatlá' tidár adór makaá baraá sla/a iigahhaateek, xoordaá uren awa /uuruú koomá', adór boohhár yaqambe nee daqtá /uuruú koom ar tsa/eeto, muxaaximeek ay dír iiaaín nay faxaatiya', nee lapiya ngi hanisiya', kudá' slaqwarár sla'á' tsiyayaxeek.

³¹ Ya/abuuse nin hardát Misrír wa ale, múk Kushi Mungú gu dabaaín i tlees ar gaanslaay.

³² Faltá yaamu Mungú na i daa'aak, Aako xirfayeemisaak ar daa'aangw.

³³ Mungú doorií dirií', kuduú iimír qaro, ina ilawaáts ar afór /uuruú koom.

³⁴ /Uuruú Mungú waahhaak, inós a waawutmoó múk Israeli, aleesleemuwós aa hardáh ay doori.

³⁵ Mungú an kudá' dae tlaáq dirós tidá' hhoohhooe, an Mungú Israeli. Inós mukós gu /uurií hanmiis, nee aleesleemu. Mungú xirfayeemisaak!