WARA'AMI 66 - Ya/abtór hho' 1977

Daa'ángw Xirif nee Sluufaay

(Daa'aangw. Wara'ami)

¹ Yaamu sleémeero Mungú diidi'iimisaak ar bara/.

² Xirfuuwós daa'aak, inós xirfayeemisaak!

³ Mungú bawaak, “Tlehhmi'iiwók iwa dae tlaaqiya' a adór milá? Asma /uuruuwók ku úr, wakuuseerók ni hardát tiri niinaweemís geeraawók i alé.

⁴ Muu sleémeero i sluufimiis uri i daa', eeít, umuuwók kuri xirfayeemiis ar daa'aangw.”

⁵ Qwalaasé', xuxuuaak tlehhma'aá Mungú aa tleéhh, tlehhma'aá Mungú aa tleéhh tla/ángw muko i dae tlaaqiyá'.

⁶ Tlawi gana warqeés tari yaamaá kaahaar, baraá yaaeero muu iri waaraáhh ar ya'a'. Amoodá' an amór nguwa saqwalala/iyé'.

⁷ In waawuti'ín ar aleesleemuuwós ay alhhe'eesay wasle, inósudá' xoordaá amohhe'eemiís, dee/aanuuse mitiwa kilooín xirfayeemís.

⁸ Kuungaá xoordu, Mungúrén diidi'iimisaak, afór xirfuuwós ilahanmisaak ka axaasi.

⁹ Asma inós slafingwrén gun taami kón, nee tam ya'aarén gi mayká niwa nikiitsiya'.

¹⁰ Aá Mungú, atén kuúng taa iiát, adoodá' muqslír /awaak kar kwahhahhuuti, qoomár bar ka peésa tlehhiit.

¹¹ Tina dahás baraá baratsufaay, nee huuwár iiloo' kari qás baraá afetleerén i alé.

¹² Kuúng wakuuseerén ana pa/ángwi hanís tiwa yaamaá harakala/i, ana slahha'aán adór múk aa waaraahh ar baraá asla nee tsaxwaá yau. Ala hám daxta tina dúx tiri húp baraá saxareema.

¹³ Aníng a dáh baraá do'ók nee sluufoó da/a, al'axweesante'eé' ngari boo/eés diroge.

¹⁴ Tidár sluufay'eé' afkwe'eene naa káh, qoomár niwa baraá slahha'amuú i dirii'.

¹⁵ Aníng sluufoó da/a oo wahhaár ngu haniís, nee ilahhooár gwaandaawe, dinkwa nee hikwa nee aaraawo ngi haniís.

¹⁶ Qwalaasé', axaasé', kuungaásingá' Mungú ilaiwawa/á', aníng ngi alki/iít tidá' naa aníng i tleéhh.

¹⁷ Una ateét ar afkwe'eé', tsifrangw'eene inós una durbiibiím.

¹⁸ Geera bar muruú tlákw un inslaasláw baraá muunaáeene, AAKOÓ MUNGÚ geera iga axaasiiká.

¹⁹ Mungú aa kángw kilá' wa axaás, afór firor'eé' gaa iiárií qaás.

²⁰ Nee i xirfuuti Mungúdá' firor'eé' gaa si'iiká, tam sla'aarirós ar warqawaaká gaa hingeesiiká dir'eene.