WARA'AMI 65 - Ya/abtór hho' 1977

Daa'ángw Sluufaay

(Wara'amtá Daudi. Daa'aangw)

¹ Mungú, kuúng xirif usa hariín gawaá Sayuniro, nee amór kuunge al'axweesantarén ka boo/eesaán.

² Kuúng firo a axamís, muu sleémeero u i hardah.

³ Bar har tlakweemaaine tam dakumisuú yaariír tir ba/aaba/i, kuúng dakumisuurén un gurtleér.

⁴ Heé amohhoó' an kudá' kuúng taa tsawát, nee kuri dahi'ís iwa hooti didár hotaawók wa ale. Ar hhoeemaá do'oge atén aga yaandahhe'eesaán.

⁵ Gawaá muruudá' ti dae tlaaqa atén kuúng ti mu/aywats nee ti tu/, kuúnguduú Mungú oo ba/amaarén. Kuúng a harahhifór hhapeemo sleémeero, nee ar tlaweemaá sawen.

⁶ Tlom'i ina qás kiri gawdés ar /uuruuwók, asma /uuruuwók ku ló'wa úr.

⁷ Xuuraaír tlawi nee gwanduú ma'aay in xasltimís, nee sleeme tsimaahhír xoordu an xasltimís.

⁸ Baraá yaamu sleémeero muu tlehhmi'iiwók kudá' waa/oo/amo gin sa da'ayuut. Iimír da/aáw wa tleemu ay /uuwa kuúng muu un qwal/atimís.

⁹ Kuúng yaamu in amohhe'eemís ar tluuwaay iwa tluuwi, yaamu iga hhapér hhó' i qás nee umuú gaaro iri harmá/. Yaaér Mungú aa háts ma'aywo. Mungú, kuúng muu ugwa balángwí hanís, asma kuúng an kudá' umuú gaaro gaa amohhe'ees.

¹⁰ Hha'aá qamu iga ma'áy dalá/, gongo'oma' iga alqoomés, yaamu ina wanane'eemís ar baafáy, yaamu ina tsúq, harma/o nay ti'ít.

¹¹ Kurkú hhoó' nguna hanís, waarahhmuuwók ti du/ií hanmiis.

¹² Qawtantá baraá darma gan du/ií paahhamiis, nee goongoama' i baraa/iyá'.

¹³ Bee/aangw qawtanaay gwa tuntuúk, nee balaangw aa hamaár baraá yaamuwo, umuúqo gaaro i bará/ ar qwala/.