WARA'AMI 62 - Ya/abtór hho' 1977

Mungú an Xuumusmooeé'

(Wara'amtá Daudi)

¹ Aníng Mungú un daamaraám ar qitla, ba/amar'eé' amór i dahh a amoorós.

² Inós kilós an tlaa/ar'eé' nee ba/amar'eé', a koo/ír gawit ar iga harwet, ti baloó dingisiiká.

³ Ay xaylá hee ku /amatsegagita', kuungá' sleémeero kuwa dinkwár i muxa' inós barqo adór baquú hu'umaá slaá' laqaá slumtá daaraax.

⁴ Baraá axweesanto tin kaahi slayá' as kuwa dahhi, dirós tidá' ilaiwa/ameero, inooín lama ngi saqwalaala/iyá', afer'ine /ayma'aá tsuuqaá koomá' kin kah, ala muner'ine tan lu'umis.

⁵ Aníng Mungú un daamaraám ar qitla, harahhifor'eé' amór i dahh a amoorós.

⁶ Inós kilós an tlaa/ar'eé' nee ba/amar'eé', a koo/ír gawit ar iga harwet, ti baloó dingisiiká.

⁷ Ba/ama nee xirfueé' amór i dahhiya' a amór Mungúeé'. Mungú an adór tlaa/ár aníng i baaq, nee uni goów.

⁸ Kuungaá muu, Mungú haratlintiaak daqisleém, slahh'amuuhúng alki/iitaak dirós i alé, Mungú a dír guwayrén.

⁹ Muu a adór hiinsluú tawo, tam múk ta ilaiwawa/i a tawo sleeme. Iilooeemaín bira alqoomés i hhakwaiyá', sleémeero dinkwaro ki inslahh ta hiinsluwo.

¹⁰ Harahhifoorók ma qaasaar baraá muruú hara/uuntsa, laqaá ma daara/aamaar ar daqaari'iimár fiiso, daqaari'iima bira tláhh, muunuúwók munguwa hayót.

¹¹ Wa'aá wake Mungú ina axweés, ki/imaá tsare tí ana axamiís, adór /uuru tar oo Mungú.

¹² Nee sla'aaridá' warqawaaká i dirók, AAKOÓ MUNGÚ. Asma kuúng umuú heewo un bú' ar adoodá' tlehhmi'iiwós i dirii'iya'.