WARA'AMI 53 - Ya/abtór hho' 1977

Tlakweemaá Muu

(Wara'amtá Daudi ar intsaahhasa)

¹ Daktana in baraá muner'ín i kat, “Mungú i kaahh.” Inooín sleémeero taa hhitirumiít, sleémeero a iringuuse. Heé hhoeemaá tlehhiít i kaahh.

² AAKOÓ MUNGÚ muu gun i qaytsimiit iimír gawaá doorií wa ale as ngiwa ari, axáy, i deéro heé sagalooár koóm, heé Mungú leelehhiít?

³ Muu sleémeero aa qwaár, sleémeero naa hhitiruutiyé'. Heé hhooeemá tlehhiít i kaahh, tumu wák.

⁴ Xáy, múk tlakwemaá tlehhiít ku tsaahha wásle? Ahaá, masta muk'eé' /aay adór muruú /aymár wa ale, slám inooín i MUNGÚ firirin'aaká.

⁵ Didae dae giri eér, daér taa baloó xuiiká. Asma Mungú fadaá múk tlákw gi tsiyayaax. Giri murekees, asma AAKOÓ MUNGÚ inooín gaa sií'.

⁶ Masók ba/amár múk Israeli ni Sayunír dáhh. AAKOÓ MUNGÚ hariímár mukós birnga ki/ís, xwaylár Yakobo iri bará/, múk Israeli iri qwalalaa/.