WARA'AMI 51 - Ya/abtór hho' 1977

Firo as Gurtleemu

(Wara'amtá Daudi qoomár aarusmo Natani nguwa i daqáy asma tidá' aa tleéhh dír Bat-seba)

¹ Mungú na'ás, án gurtlawáng, ar afi qoomoó sla'aarirók ar warqawaaká, ar yaareemaá gurtleemuwók, tlakweemaeé' na fiitseek.

² Iringér'eene hamaatla hhe'eesáng. Tlakweemaeene hhehhe'eesáng, án hhoohhooeesáng.

³ Asma án iringér'eé' a xuú' nee tlakweemaeé' i dír geeraaeé' daqisleém.

⁴ Án kuúng una tlakweemáy tleéhh', kuúngú kilá', nee muruú slasl/arén una tleéhh dír geeraá ilaawoge, gawaá adoorihe kuúng tu tsaahhi adór tar dakuúsár koondaaká bar axwés, nee kwasleema bar tléhh i hariín.

⁵ Qaytsiít, iimír aníng tiwa laqwaali a tlakusmo, a tlakusmo iimír baraá guruú aayír'eé' wa ale.

⁶ Qaytsiít, kuúng tu sla'atimis nee looeemaá baraá muuná, kuúng aníng intsaahhatisáng sagalooaroge.

⁷ Hhoohhoeesáng ar hisopo, aníng daqaní ti hhoohhoó', hamaatláng, aníng daqaní ti /awaák adór tla/aá tluuwaay.

⁸ Qwala/ nee bar/uuwo hatsiisáng. Tam iga fadu giqeeri ar muxta, aníng kuúng u sa baraá/.

⁹ Ilaawók tuntukeek, tlakweemaaeé' mi i qaytaar, iringér'eé' hamaatleek.

¹⁰ Aá Mungú, muunuú hhoohhoó' i tleehháng, qeeruú /abén oo inkihhím baraaeéní qaaseek.

¹¹ Mi kwaahhaar dír geeraawoge, Qeeruwók oo Hhoohhoó' mu hingeesaar dir'eene.

¹² Qwal/uú iwa ba/amís amor'eé' ki/isang, aleeslawtisáng ar qeeruuwók muunuú ilaiwa/ame nguwa slaw.

¹³ Tlakuuse a intsaahhatís lohduuwoge, nee múk tlakuuse niri amoorógi kii/.

¹⁴ Aá Mungú, Mungú ba/amusmooeé', ba/amisáng tseerdaá muu miwa ku'umiís, tsifrangw'eene adoodá' ira ba/amís an daá'.

¹⁵ Áa Aáko, afkwe'eé' waatleeseek, xirfuuwók nguwa alki/iit.

¹⁶ Asma tu sla'atisiká nee ilahhooár sluufaay tam ngi duuxa, kuúng u qwal/atiská ar ilahhooár ta da/aa/an.

¹⁷ Ilahhooár Mungú i ilaoohi a qeeruú aa ya/an amoorós i ale, muunuú aa gwadiidin nee oo aa dutlutlu/uut, asma Mungú gu waaqaaiiká.

¹⁸ Sayuni hhooeemií tleehheek ar gurtleemuuwók, koo/ír Yerusalemu tleehheek.

¹⁹ Daqaní kuúng tu sla'atis nee ilahhooár ta da/a/an ar muruú slaáf, daqaní awee kingi huuw dír kitángw ilahhooár Mungú ki duxaxin.