WARA'AMI 50 - Ya/abtór hho' 1977

Xirfayeemisuú Ló'

(Wara'amtá Asafu)

¹ AAKOÓ MUNGÚ, Mungú Aleesleemusmo, in axwees, múk baraá hhapeemo sleémeero gun amoorós i ateetín da/aáw wa tleemu ay /uwa.

² Iimír baraá Sayuniro, gixsadá' ló'wa hhoohhoo', gwa/ateemaá Mungú i qwiirii/iyá' adór tsee/amá.

³ Mungúrén ni hardah, slám ni qawti hardihiiká, asltá /ayiim i dír geeraawós wa hi'ít, nee bambaaór duhhúm i fukuukú' nguwa harwedit badu sleémeero.

⁴ Doori nee yaamu giri ateet, mukós guri sakwasleemuut.

⁵ “Kudaá haratlintauuser'eé' awa inkihhimuú koomá', awa alqadu ngaa qaasiye' dir'eé' ar sluufaay burumburaare'.”

⁶ Doori gan'amuuwós ngu alki/iitiyá'. Asma Mungú inós an sakwasleemusmo.

⁷ “Kuungaá muk'eé', iia qaasaak, gár ni oo' i deer. Israeli, adór kuúng tay diri' ngi lamabuú'. Aníng an Mungú, aníng a Mungúwók.

⁸ Gár us i gahhamiit a sluufaywogeeká. Nee sluufaywók oo ta da/aa/aan i dír geeraaeé' qooma sleémeero.

⁹ Awuú baraá guruú do'ók u yaahasaaká, tam gurtuú baraá matla/aangók sleeme.

¹⁰ Asma umuúqo makito'ooro ar baraá sla/a a te'eé'. Nee daqooroó makaay oo gawaá tlom'i oo kume a kwe'eé'.

¹¹ Tsir/ór gáwtí tlatlaw sleémeero a xuú'. Umuúqo gár slafa ar baraá aya a te'eé'.”

¹² “Geeraawo bar aníng an qwariita, un qo ádbawaaká. Asma yaamu a kwe'eé', tam muruú daanduú yaamu a kwe'eé'.

¹³ Xáy, fu'unaá awee in /áya? Laqaá tseerdaá aara in wahaáma?

¹⁴ Mungú ilahhooár sluufáy duxuumeek. Al'axweesantók boo/eeseek dír kudá' gawtí diriia.

¹⁵ Án ateetáng deelór slahh'amaayeero. Án kuúng u ba/amís, aníng iri xirfayés.”

¹⁶ Ala Mungú tlakusmo gu babay, “A milá kuúng gár kaahir'eé' kas alki/it, nee alqador'eé' gár kas axwes ar afkók?

¹⁷ Asma kuúng naanaqtaeé' aga áhh. Nee axweesanay'eé' ugwa aluuwógí kwáhh.

¹⁸ Barnaxes fisusmo ugwa aán, an mulqumoowók, slám nee fuquuse an aldinku'uumisá'.”

¹⁹ “Afkók ugwa algeemeér muruú tlákw nguwa alki/iiti. Nee tsifraangók lama gan axwees.

²⁰ Aga iwít hhiyaawók kuwa kaantiin, garmoó aayoorók ugwa /aysántí tsát.

²¹ Adoorí an adoodá' taa tléhh, aníng nay xasliít. Kuúng kawa xu' aníng aqo adór kuúng. Ala aníng kuúng u iigahhaát, muruuwí sleémeero ngu geehhoeés dír geeraawógí alé.”

²² “Tí alhooreesaak, kuungaásingá aníng i gunqaaremisá', án kuungá' munduwa karslamiís, tam heé nu tuú/ iri qwaar.

²³ Kudá' aníng i ilahhooár sluufáy duxuúm, an kudá' aníng i xirfayeemiís. Heé digir waketiingós gwaa qoomees aníng u ba/amís!”