WARA'AMI 48 - Ya/abtór hho' 1977

Sayuni Gixsár Mungú

(Wara'amtá daaqoó Kora)

¹ AAKOÓ MUNGÚ ku úr, i harín kuwa ló'wa xirfayeemisi, baraá gixsár Mungúrene, gawaá tloomarós tidá' hhoohhooe.

² Sayuni a tloomár Mungú ar sla'atimis adór ira sihhiti, a gixsár waawutmoó úr ar qwal/uú huwahuuw baraá yaamu sleémeero.

³ Mungú i baraá maraydaá gixsár i dirii', inós taa laqán tawa baqmór saxamaár.

⁴ Asma ga/aawaak, waawitá ina burumburimiít, sleémeero tari haratláy amór gixsár Sayuni.

⁵ Qoomár gixsa kawa ár, tari ló'wa da'ayuút, tay amoqwaqwdín tari gaanslár goów.

⁶ Daaraxaay giri áy diidaádí ale, tari daandeemo feehhamiít daero, slahha'amuú adór kuquú /ameenír xwayla nguri slayé'.

⁷ Tay adór bambaaór da/aá daahh, ar miringér Tarshishi ga geqaaqaw.

⁸ Adoodá' aáng kara axaasaán an adór hamí kara araán, baraá gixsár AAKOÓ MUNGÚ Aleesleemusmo, eeít, baraá gixsár Mungúrén, tidá' Mungú i gawdeesi ay kureeraá kureér.

⁹ Xáy Mungú, sla'aarirók ar warqawaaká atén an aldakwaán, baraá Do'ók oo hhoohhoó' wa ale.

¹⁰ Aá Mungú, umuuwók aa xu'utiít, ku xirfayeemiis baraá yaamu sleémeero. Dakók oo doó /iyayhe an baaliliín.

¹¹ Tloomár Sayuni i qwalaala/, múk Yuda ta baraa/i asma sakwasleemarók tidá' ganaa'.

¹² Hi'iimité', gixsár Sayuni harweditaak, gixsa harweera hhe'eesaak, tsitseenaá koo/irós fadiitaak.

¹³ Koo/irós tsee/arimaak, baraá kutwaywós aldahaak, daqaní qartá hi'iit ka beera',

¹⁴ “Adoorí an adór AAKOÓ MUNGÚ i dirii'i, Mungúrén i alhhe'eesoó konká. Inós atén tin geerahaar ay kureeraá kureér.”