WARA'AMI 46 - Ya/abtór hho' 1977

Mungú nee Atén Dinkwa

(Daa'ángw daaqoó Kora)

¹ Mungú a dír guwayrén nee an /uuruurén adoorí atén aga araán, baraá slahh'aamuurene inós atén tina alee/iís.

² Gawaá adoorihe atén a da'ayumiitanaaká, tam yaamu ni warqaqay'a, tam tlom'i binda diingitiyé' nay huuiyá' baraá iltá tlawi,

³ tam gwaanduú ma'aay bir xuuruu', laqaá tam tlom'i binda diingitiyé' as tlawi iwa /eeragwa'.

⁴ Yaae i deer, ar ma'aywós mukduú baraá gixsár Mungú ngu qwal/atimisá', didá' hhoohhoo' ar Mungúduú Gawa aa hotaangós i qaás.

⁵ Mungú i baraawós i dirii', gár ga diinqiis i káhh. Mungú ga alee/iis matlatlér boo/e.

⁶ Xoordu naa leexutiyé', waawuti'iima iri amoqwát. Mungú afoorós gay tlees, yaamu nari weeqiyá'.

⁷ AAKOÓ MUNGÚ Aleesleemusmo an dinkwa nee atén. Mungú Yakobo a dír guwayrén.

⁸ Qwalaasé', araak tlehhma'aá AAKOÓ MUNGÚ. Inós tlehhma'aá waa/oo/amo gina tleéhh awa dae tlaaqá' baraá yaamuwo.

⁹ Slaqwara gan har'ohín baraá yaamu sleémeerowo. Ga/aldu nee lawlu gin giqáy, nee gaardaá slaqwara gin da/a/án.

¹⁰ “Haay xasliité', tsaahhaak adór aníng tar Mungú! Aníng taa iia tleereés baraá xoorduwo, ti iia tleér baraá yaamuwo!”

¹¹ AAKOÓ MUNGÚ Aleesleemusmo a dinkwa nee atén, Mungú Yakobo an dír guwayrén.