WARA'AMI 29 - Ya/abtór hho' 1977

Afór AAKOÓ MUNGÚ ar baraá Bambaao

(Wara'amtá Daudi)

¹ AAKOÓ MUNGÚ xirfayeemisaak, kuungásingá' gawaá doori awa taa tleéhh nee Mungú, AAKOÓ MUNGÚ xirfayeemisaak, xirfuuwós nee aleesleemuuwós alki/iitaak.

² Umuú AAKOÓ MUNGÚ xirfayeemisaak as kuwa úr, AAKOÓ MUNGÚ i tumbarara'ataak ar tlabaá hhohho'.

³ Afór AAKOÓ MUNGÚ ka axamiis, i gawaá ma'aay. Mungú xiríf kwarara/a ga kududuhuus. Afór AAKOÓ MUNGÚ ka axmiis gawaá daanduú tlabeemo!

⁴ Afór AAKOÓ MUNGÚ i /uuruú koón. Afór AAKOÓ MUNGÚ i aleesleemuú koón.

⁵ Afór AAKOÓ MUNGÚ xaa'aá miereési gin giqeér, AAKOÓ MUNGÚ xaa'aá miereésír gawaá tlom'aá Lebanoni gin giqáy.

⁶ Tlom'aá Lebanoni gin adoorí laaq, niri /akumitiyá' adór tsa/eeto, nee tloomár Hebroni a adór saree/ár batlito'o.

⁷ Afór AAKOÓ MUNGÚ mankari ngin gwa/atamís adór tsángw asla.

⁸ Afór AAKOÓ MUNGÚ darma gun daaraxás. AAKOÓ MUNGÚ darmuú Kadeshi gun daaraxaas.

⁹ Afór AAKOÓ MUNGÚ tlaaqati gari xwaylitís, xaai giri diingitís giri qafo fíq baraá darmuuwo. Baraá Do'ós sleémeero ta ooi, “AAKOÓ MUNGÚ i xirfuuti.”

¹⁰ AAKOÓ MUNGÚ a baalusmo tam daanduú tluwoó da/atene. AAKOÓ MUNGÚ a waawutmo ay kureeraá kureér.

¹¹ AAKOÓ MUNGÚ mukós gu /uuruú i haniis, AAKOÓ MUNGÚ mukós gu tsuuq ngway waydií haniis.