WARA'AMI 28 - Ya/abtór hho' 1977

Firo as Alee/isaay

(Wara'amtá Daudi)

¹ AAKOÓ MUNGÚ, án kuúng u i /aa/amiím, kuúng a dír guway'eé'. Iiárií qaasáng ma xasliitaar. Bira mu/aywatsiká, aníng a slaqás, nee mukdá' aa qaatl iri /eét baraá gi'i.

² /Aa/ee'eé' iiárií qaaseek qoomár bar alee/isoó fiririím, dabaaeé' bira gawtí tleés amór Do'ók kudá' hhoohhoó'.

³ Aníng mi harahuwaar dinkwa nee múk tlakuuse, kudá' tlakweemaá tlehhahhiít. Afer'ine i wayduú axweesiyá' dír inslaaway'ine, ala baraá muner'ine gár aa hats a wakaari.

⁴ Inooín li/áy bueek ar hariímár tlehhmi'ii'ín, ar hariímár tlakweemaá i tlehhahhitiya'. Li/áy bueek ar hariímár tlehhma'aá dabaaín. Adór kis hariím ti tlehh.

⁵ Inooín tlehhma'aá AAKOÓ MUNGÚ ngi gaárí xuiaaká, tam muruudá' aa tleéhh ar dabaawós sleeme. Gawaá adoorihe gin hhaamees, slám gi baloó gurtlayká.

⁶ AAKOÓ MUNGÚ i xirfuuti! Asma firor'eé' gaa ya/án.

⁷ AAKOÓ MUNGÚ a /uuruueé' nee gaambór aníng i baaq. Inós un haratlintií' ar muunaáeé' sleémeero. Aníng ina alee/iís niri qwalaá/ baraá muunuúeene, un sluufimiís ar daa'ángw qwala/.

⁸ AAKOÓ MUNGÚ a /uuruú mukós. Waawutmoowós kudá' aa tsawaár gun baaq guri ba/amis.

⁹ AAKOÓ MUNGÚ, mukók ba/amiseek, kudá' kók sleémeero tsuuqeek. Kuúng ta de'emusmooín, inooín gagariimeek ay kureerisleém.