WARA'AMI 27 - Ya/abtór hho' 1977

Amohhooár Dír Mungú

(Wara'amtá Daudi)

¹ AAKOÓ MUNGÚ an gwa/ateemaaeé' nee ba/amar'eé', heé ni daimiit a heemá? AAKOÓ MUNGÚ a baqmór slafingw'eé', heé ni xuruumiit a heemá?

² Múk tlakuuse niwa amor'eé' haratláy, as aníng iwa gu/tá wa slai, wakuuser'eé' tí sleémeero tari dukuúts nee tari huuhu'ún.

³ Tam slaqwaruuse ti amohhe'esa as tiwa muxaan nee aníng, ala án a baloó dae feehhiitaaká. Tam aníng slaqwara i harati'ita, ala qoomadae án Mungú un harahhiíf.

⁴ AAKOÓ MUNGÚ ugwa firiím gár wake, hamí a tí ni leelehhiit. Masók a hoót Doó AAKOÓ MUNGÚ wa ale deelo sleémeero baraá hotaarir'eene, hhohhoartá AAKOÓ MUNGÚ ngiwa ga/aw, nee sla'aarirós ngiwa yaahamiis baraá Do'ós wá aleeró.

⁵ Bál deelór slahh'amaayeero, inós i luu/ baraá xaftós i alé. Inós i tuntuuk baraá guruú heémarós i alé, iri qaas dír saxamaár gawaá tlaa/a.

⁶ Hám daxta aníng a kweree'aaká, ti axmaamiis gawaá daanduú wakuuser'eé' tidá' iga harwet. Aníng sluufoó bara/ nguri duúx baraá heémár Mungú i ale, AAKOÓ MUNGÚ nguri xirfayeemiís ar daa'aangw.

⁷ AAKOÓ MUNGÚ, afór /aa/ee'eé', iiárií qaaseek, i qaytáng ar gurtleemu nee mu/aywatsáng.

⁸ Kuúng ana ó', “Aníng leelehhiitaré'.” Aníng niri oó', “AÁKO, án kuúng u leeleéhh.”

⁹ Mungú, ilaawók mi aníng wa lu/aar. Anuú sagadyusmoowók mi guusaar ar buhhta. Kuúng dir'eene a alee/isusmo. Án mi geexawaar, laqaá tam mi mawaar, Mungú, kuúng a ba/amusmooeé'.

¹⁰ Baabuúeé' nee aayír'eene tam iga si'iyé', ala AAKOÓ MUNGÚ aníng in ilaaoh.

¹¹ AAKOÓ MUNGÚ, án kuúng intsaahhatmisáng loohiroge, nee geeraharáng baraá loohír ganaa'a, asma wakuuser'eé' i deer.

¹² Mi haniisaar baraá dabaá wakuuser'eé'. Asma lamabu'uusér lama iga sakí/, inooín aníng i /atlií /ayiyá'.

¹³ Aníng a haratlintatií' niwa hoot ay dír hhooeemaá AAKOÓ MUNGÚ ngay ar baraá yaamaá múk slafa.

¹⁴ AAKOÓ MUNGÚ na harahhifeek! Ilakaahareés, muuna hhe'eés, AAKOÓ MUNGÚ na harahhifeek!