WARA'AMI 24 - Ya/abtór hho' 1977

Waawutmoó Xiríf

(Wara'amtá Daudi)

¹ Yaamu nee muruudá' sleémeero gaa hatsiis an daqaari'iimár AAKOÓ MUNGÚ, yaamu nee múk baraawós wa hoota a kós.

² Asma inós iihhafiirír yaamu gana qaás gawaá daanduú tlawi, gawaá yauuwo iihhafiirirós gana gawdeés.

³ “A heemá oo tsa/ám gawaá tloomár AAKOÓ MUNGÚ? A heemá oo sihhiít dirós tidá' hhoohhoo'?”

⁴ “A heé daba' hhohhó' nee oo muunaáwós /awaák. Inós munguaá hatlá' gi slaiiká sluufimisuuwo, inós lo'o ga /ayiiká as al/ayma.

⁵ Heewí tsuuqa gi ilaoh dír AAKOÓ MUNGÚ wa ale, nee inós ku waahhamín nee AAKOÓ MUNGÚ ba/amusmoowós adór kur dakuús wásl.”

⁶ “Múk adoorí dirií' an kudá' Mungú gu leelehhiít, an kudá' tseewuwá' dír Mungú Yakobo.”

⁷ “Kuungaásingaá afér gixsa, gweerita hhe'eesé'! Kuungaásingaá afér qaránqar gweerité', waawutmoó xirfuú koóm i dahi!”

⁸ “A heemá waawutmoó xiríf?” “A AAKOÓ MUNGÚ /uuruú koóm nee aleesleemu, AAKOÓ MUNGÚ baalusmoó slaqwara.”

⁹ “Kuungaásingaá afér gixsa, gweerita hhe'eesé'! Kuungaásingaá afér qaránqar gweerité', waawutmoó xirfuú koóm i dahi!”

¹⁰ “A heemá waawutmoó xiríf? A AAKOÓ MUNGÚ Aleesleemusmo. Inós an waawutmoó xiríf.”