WARA'AMI 22 - Ya/abtór hho' 1977

Slahh'amaayér Heé Ganaá' nee Harahhifoorós

(Wara'amtá Daudi)

¹ Mungúeé', Mungúeé', án misa meér? Kuúng mustu saáw, mis alee/iská uwa i /aa/amiim baraá slahh'amkueene.

² Xáy, Mungúeé', án a /aa/amiím tlaatla/aango, ala kuúng iga mu/aywatská, nee qoomár xweeraawo a /aa/amiím ala amohhooa a slaslawaaká.

³ Ala kuúng aqo kudá' hhoohhoó', kuúng a waawutmoó ta xirfayeemisi nee múk Israeli.

⁴ Baabi'iirén kuúng una harahhifiyé', una harahhifiyé', kuúng kiri ba/amís.

⁵ Tuna i /aa/amín, tari ba/án, tuna harahhiíf kahhoó' mikiwa murekeés.

⁶ Ala aníng a naanagi, a heewooká, taa kángw i sií' tin waaqaqaa' nee muu.

⁷ Kudá' aníng iga ariye' i waaqasesená' kángw kilá' wa ale, i niqimisiyá' iwa sagér i dingitimisiya'.

⁸ I kaahiya', “AAKO guna harahhiífiíke? Ala musungu gweeriiká, bar ku sla'atimis nee inós, musungu ba/amisiiká?”

⁹ Ala kuúng, AAKOÓ MUNGÚ, a kudá' aníng iga dux baraá guruú aayír'eé' wa ale, nee iri de'eén qoomár aníng tawa na/oó du'uúm.

¹⁰ Iimír tiwa laqwaál kuúng ina deaeén. Iimidaádae, kuúng an Mungúeé'.

¹¹ Kuúng dir'eene ma sawesaar, asma slahh'amu ku tseéw, nee heé i alee/iís i kaahh.

¹² Wakuusér yaariir iga harwét adór awér yaqaambe. Inooín ina harweeriyé' adór yaqaambér xaraasl ar yaamaá Bashani.

¹³ Iga afeérí awaatliyé' adór dirángw /oroótl oo gár feehhamisuú wa slaá'.

¹⁴ /Uuruueé' ina faák adór ma'aá naa ku'uutiye', fadueé' nay kwirhhimitiyé'. Muunaáeé' iri weéq baraaeene adór boohhayaangw.

¹⁵ Hheehhar'eé' ina kát adór qambeesamo, tsifrangw'eé' aa nag'aát baraá xaanxardu. Kuúng án iga meér adór tuuár baraá teeri.

¹⁶ Boohhár wakuuse iga harwét adór seeaawe, ya'aaeé' nee daba' kaa fooxamiís.

¹⁷ Ana beehhuút fadu kiri fát, wakuuse i ilií duxuún, i kaantiín.

¹⁸ I tlabaeé' qasmiisiyá'. Nee hiyay'eé' nguri tsawdór i tleehhiyé', áx heé gu sláw.

¹⁹ AAKOÓ MUNGÚ, kuúng ma saweesaar dir'eene, kuúnguduú alee/isay'eé', gaanslutáng iwa alee/is!

²⁰ Aníng ba/amisáng dír paángaro, slafingw'eé' dír /uuruú seeaaweero.

²¹ Afkuú diraango aníng na ba/amisáng, nee dír xareemaá saree/aro.

²² Aníng tlehhemi'iiwók i alki/iít dír hhaee'eene, baraá tla/ángw boo/aywo u xirfayeemiís.

²³ Kuungaásingaá AAKOÓ MUNGÚ ilaiwawa/á', xirfayeemisaak! Kuungaásingaá awa xwaylár Yakobo, diidi'iimiisaak, kuungá' sleémeero awa xwaylár Israeli, AAKOÓ MUNGÚ ilaiwawa/aak!

²⁴ Asma inós slahh'amaayér liitlakusmo gaa waaqaiiká, nee gu mayká i qaytaro. Ala qoomár burungu i /aa/amín gun mu/aywaats.

²⁵ Baraá diinku'uumár ure án kuúng un xirfayeemiís. Al'axweesante'eé' an boo/eés, dír geeraá kudá' kuúng ilaiwawa/a'a.

²⁶ Awa liitlakwen i /ayiná' niri aaxiyá', awa AAKOÓ MUNGÚ ngu leelehhiitá' ngu xirfayeemisiyá'! Inooín i hotaatine' ay alhhe'eesay wasle!

²⁷ Múk baraaká' yaamu sleémeero kaangwí oo AAKOÓ MUNGÚ ku insláy, tari amoorósí kii/. Múk xoordu sleémeero nee tlahhi'i sleémeero AAKOÓ MUNGÚ kway i tumbarara'aat.

²⁸ Asma waawuti'iima ar AAKOÓ MUNGÚ. Inós an kudá' xoordu gi sa waawuti'iím.

²⁹ Múk daara/uuse sleémeero baraakaá yaamuuwo i tumbarara'aat dír geeraawós, tam kudá' sleémeero qatlá' nee kudá' slafingw'ín /iisaro ngu aleeslawa'aaká, ta tumbarara'aat dirós.

³⁰ Xwaylarós gu sagadiyús. Muu axweesantá AAKOÓ MUNGÚ gay alki/iit dír qartá aluú wa hi'iit.

³¹ Inooín tlehhmi'iiwós awa ba/ama kiri alki/iit dír múk taa laqwaliká, kuri bay, “Mungú adoorí gana tleéhh.”