WARA'AMI 21 - Ya/abtór hho' 1977

Sluufaay as Arba/ati

(Wara'amtá Daudi)

¹ AAKOÓ MUNGÚ, waawutmo /uuruudá' taa hanís gu sa qwalalaa/, i ló'wa qwalalaa/ as alee/isaywók.

² Tidá' muunaáwose i slai aga hanís, tidá' afkose aa firín aga /itiindiiká.

³ Una i hardát ar tsuuqaá hho', sagós ugwa slamángw sahaábuú hhoohhoó' i dahás.

⁴ Inós slafiingw guna dirógí firín kuri hanís, slafíngw deelór yaariir oo alhhe'eesoó koomaaká.

⁵ Xirfuuwós ku úr asma kuúng una alee/ís, kuúng una iiatleerés kuri ilaiwa/amérí hanís.

⁶ Kuúng inós una tsuuqaá alhhe'eesay wásl i hanís, inós i haats qwal/uwo kuúng burtu dirósí tseéw.

⁷ Harahhifór waawutmo i gawaá AAKOÓ MUNGÚ, waawutmo ku hingeesiiká asma sla'aarír warqawaaká ar Mungú Gawa.

⁸ Waawutúmo, kuúng wakuuseerók sleémeero a ohiín, dakók oo doó /iyáy kudá' kuúng u ahhiitá' gi ohín.

⁹ AAKOÓ MUNGÚ, kuúng binda hardát, in qwaarés ar asla. AAKOÓ MUNGÚ inós gin hhaamees ar buhhtaawós, inooín asla giri fák.

¹⁰ Kuúng xwaylar'ín a qwaarés gawaá daanduú yaamuuwo, na/'ii'ín nari meetiaaká.

¹¹ Inooín bar muruú tlákw ngun dirógí tleehhamór wa slaiyá', laqaá bir loohír leelehhiitiyá' ar kuúng tuwa qwaareesi, adoodá' ka baloó aleeslayká.

¹² Inooín i guuwiyá' asma ga/aleerók, asma kuúng gitsee/er'ín a qoomés ar maheeriwók.

¹³ AAKOÓ MUNGÚ, atén kuúng u xirfayeemisaán as /uuruuwók. Atén a daa'aán nee /uuruuwók u xirfayeemisaán.