WARA'AMI 20 - Ya/abtór hho' 1977

Firo as Arba/ati

(Wara'amtá Daudi)

¹ AAKOÓ MUNGÚ u mu/aywatsi deelór slahha'amko. Mungú Yakobo kuúng u de'en,

² U alee/isoó amór Do'ós daáhh i huwi, nee alee/isoó Sayunír daáhh ngu huwi.

³ Sluufaywók sleémeero ngu ilaoohi, nee sluufaywók kuduú da/aa/aangw ngu saqwalaa/i.

⁴ Tidá' muunaáwoge ta sla' ngi haniisi, nee tidá' ta tleehhamór wa sla' ngi ya/amisi.

⁵ A qwalaala/aán as daanduú arba/atír amoorók daahh. Nee tari baraa/aán umuuwós kuwa xirfayeemisaan. AAKOÓ MUNGÚ tidá' sleémeero kuúng ta firiin ngi haniisi.

⁶ Án daxta a xuú', AAKOÓ MUNGÚ waawutmoowós kudá' aa tsawaár gu arba/atír i haniis, ngun mu/aywaats gawaá dooriwós kudá' hhoohhoó' wa ale, gu arba/atírí haniis ar /uuruuwós kudá' úr.

⁷ Kookaari gaardaá slaqwara ngin harahhifiyá', nee kookaari farsuú slaqwara. Ala atén AAKOÓ MUNGÚ, Mungúrén, un harahhifaán.

⁸ Múk adór kwí ta dukuuts nee tay huhu'ún, ala atén an sihhiitaán tari /atlaán.

⁹ AAKOÓ MUNGÚ, waawutmo arba/atír i haniiseek, atén kuúng ti mu/aywats bál bura ateetaán.