WARA'AMI 2 - Ya/abtór hho' 1977

Waawutmoó taa Tsawaár nee Mungú

¹ Ahaá waáy, xoordu misinda barti'ín ayé' as nguwa geewaqaatiya'? Ahaá waáy, tlahh'ii sleémeero gár i qoomemesiya' mas muruú tawo?

² Waawituú daanduú yaamu ti amohhe'emiis as tawa haratlay, nee geeraharuuse taa kaahi sleér daanduú AAKOÓ MUNGUHE, nee daanduú kudaádá' inós aa tsawaár as tawa waawutmo, tawa kaahi,

³ “Waawiti'iimar'ín an siaán, nee baalir'ín kari siaán amór saáwí alé.”

⁴ AAKOÓ MUNGÚ kudá' gawaá doorií wa baaliliím gi waqaseesén, nee tidá' i tlehhitiya' gan niqimis.

⁵ AAKOÓ MUNGÚ giri naanaáq ar buhhta, giri dae tlaáq ar buhhtaawós awa xaraaslá', iwa kaahi.

⁶ “Án waawutmooeé' ngwa qaás gawaá Sayuni, tloomar'eé' tidá' hhoohhoo'.”

⁷ Waawutmo i kaahi, “Aníng hara'ayadá' AAKOÓ MUNGÚ naa oó' an alki/iít. Inós ina báy, ‘Kuúng an garmaaeé', án laarí kuúng ugwa laqwaál.

⁸ Án firiimáng, daqaní aníng xoordu ngi kuúngí haniís. Nee yaamu sleémeero ngi kuúngí haniís tawa daqaari'iimaarók.

⁹ In naasuúr ar hhartá muqsli, kiri parhhamís adór xooslmoó tleei.’”

¹⁰ Daxta kuungá' waawitá, fuquriimé', kuungaásingá waawituú yaamu, gurbu'utí iiárií qaasaak.

¹¹ AAKOÓ MUNGÚ sagadiyuusaak ar ilaiwa/ame, i tumbarara'ataak ar daaraxaay,

¹² as miwa buúhh, kuungá' tay qwadá' baraá loohi, asma buhhtaawós ni hardahiyá' ar gaanslaay. Kudá' sleémeero ngwa i guwiye' ki amohhoo'.