WARA'AMI 146 - Ya/abtór hho' 1977

Xirif as Mungú Ba/amusmo

¹ AAKOÓ MUNGÚ xirfayeemisaak! Aá hhintlueé', AAKOÓ MUNGÚ xiirfayeeseek!

² AAKOÓ MUNGÚ u xirfayeemiís qoomár niwa hoot, Mungúeé' un i daá' qoomár niwa slaaf.

³ Geeraharuusér muu ma harahhifaara', hee mu harahhifaara' asma dír heewo ba/ama i káhh.

⁴ Hiinsluú hee in ti'iit iri kii/ baraá hhape, baldae muruudá' sleémeero aa qoomameés in qwaar.

⁵ Heé amohhoó' a kudá' alee/isaay gu harahhiíf dír Mungú Yakobo, nee harahhifoorós i dír AAKOÓ Mungúwós.

⁶ Kuduú tleehharusmoó doori nee yaamu, tlawi nee mura' sleémeero kudá' baraaíní dirii', tidá' sleémeero aa oo' gan boo/ees ay alhhe'eesay wasle.

⁷ Mukdá' taa barqantuús guri sakwasleemár ganaá' i tleehh, kudá' qwariitá' giri muruú /aymár i haniis. Kudá' taa tsegiít AAKOÓ MUNGÚ gay gweer.

⁸ AAKOÓ MUNGÚ taampu giri ila' qaytsitis, AAKOÓ MUNGÚ kudá' ta slahh'eemisi gin alee/iis, AAKOÓ MUNGÚ múk hotaa ganaá' gu slaa'.

⁹ AAKOÓ MUNGÚ dahaaye ga amohhe'eemiis, panaay nee kwaeeli gin /uuruú i qamín. Ala múk gana'a'aaká gun qwaarees.

¹⁰ AAKOÓ MUNGÚ i baalín ay alhhe'eesay wasle. Aá múk Sayúni, Mungúhúng an waawutmoó qari sleémeero. AAKOÓ MUNGÚ xirfayeemisaak!