WARA'AMI 144 - Ya/abtór hho' 1977

Waawutmo i Mungú Sluufimiis as Arba/ati

(Wara'amtá Daudi)

¹ AAKOÓ MUNGÚ ku xirfayeesi, inósuduú tlaa/ar'eé'. Aníng iga intsaahhatís slaqwaraaro, slaqwarár daba' nee ditsaawo.

² AAKOÓ MUNGÚ an tlaa/ar'eé', baqmor'eé' nee gweerusmooeé', dír nanhatar'eé' nee dír guway'eé', dír naa harahhiíf as kawa saxmaár. Xoordu ngina iialooatís amor'eé' i ale.

³ AAKOÓ MUNGÚ, hee a gár milá kuwa inlasleér? Laqaá na/oó hee a gár milá tam kuúng kuwa i qaytsit.

⁴ Hee a adór tawo, deeloorós a adór hhantamoó waraáhh.

⁵ AAKOÓ MUNGÚ waáy, dooriwók mahhatiisang Tlom'i kwatiiteek, inooín quui ngi duuxiye'.

⁶ Wakuuseerók diyaa/eek ar wer'eelíngw maankaro. Maheeriwók tlaquuteek amor'ín i ale i guuwiye'.

⁷ Taatahháng gawtá wa ale, án ba/amisáng, án duuxáng baraá ma'aá yaariire, ba/amisáng dabaá hoomaaro.

⁸ Inooín afer'in in lamtá kaahiyá'. Lo'ór lama ngin /ayiyá' ar daber'ín ar doó /iiyáy kawa gáwtí tleemisi.

⁹ Mungú waáy, án kuúng u daa'ángw /abén i daá', nguri daá' ar seésér hhutleemaá mibaangw.

¹⁰ Kuúng an kudaádá' baali ga hanmiís dír waawitá. Kuúng sagadiyusmoowók Daudi una ba/amís.

¹¹ Án ba/amisáng dír tsatoó xaraasle, tu/áng dabaá hoomadá' afer'ine lamemaá tlaaq, dír mukdá' lo'ór lama ga /aáy, ar dabér doó /iiyáy ngiwa gáwtí tleemisiya'.

¹² Daaqayrén masók in adór hhoó' ar uraaráy, adór dahaasíngw naa ti'iit oo ti'ina hhó'. Dasuurén a adór uheemiidaádá' Doó Mungú, kudaádá' taa parootuús ar adoodá' Doó Mungú wa hariim.

¹³ Kuuntáyrén i hatsi umuú gár /aymaaro. Bee/angwrén i tsiirin, nee kume mibaangw ngi laqwaali baraá qawtantarene.

¹⁴ Hikwaarén masók ki slaqwa hho'. Gur'e mingiwa kwakwahhiyé', laqaá na/'ii mingiwa slaqwarahhiné'. Qununu/aay laqaá /aa/ee mindiwa deeruutiyé', baraá lohduurene.

¹⁵ Ku amohhoó' múk tsuuqaá adór kuká' gaa slay. Ku amohhoó' mukdá' oo AAKOÓ MUNGÚ tawa Mungúín.