WARA'AMI 141 - Ya/abtór hho' 1977

Firór Tsiindo

(Wara'amtá Daudi)

¹ AAKOÓ MUNGÚ, án kuúng u ateét, hardaháng ar gaanslaay. Án kuúng bur ateetiím, afor'eé' iiárií qaaseek.

² Firor'eé' ilaooheek adór xarángw tsuu'. Dabaaeé' ngi amoorók ii tleés adór ilahhooár tsiindo.

³ Aá AAKOÓ MUNGÚ, afkwe'eé' xuumeek, /ayma'aá afkwe'eé' qwatsiimeek.

⁴ Muunuúeé' mu amór tlehhmuú tlaákw xu'usar, tlehhma'aá tlakw miwa intsaáhh, nee múk tlakweemaá tlehhahhiít mawa aldinku'usaán, tam muruú /aymar'ín kuduú gi'i muwa /aáy.

⁵ Heé ganaá' án i tahhi, asma i gurbuu' ar sla'aari. Ala aníng a ya/aamaaká múk tlákw iwa imbalaaxi. Asma án daqisleém firo aga mawiiká, as tlehhmi'ii'ín awa tlakw ngiwa sií'.

⁶ Geeraharuuser'ín bar kinga kwaáhh yaamií ale, gawaá kaankír tlaa/a, daqaní axweesante'eé' ngi tsahhiyá' adór tar ló'.

⁷ Adór migír kur feehhamamisi nee kur parhhamaamisi yaamií ale, an adór faduuín kir tsiyayaxi dír afkú /etángw baraá gi'i.

⁸ Ala AAKOÓ MUNGÚ, ilaaeé' amoorók ngin ga/ayá', án naa amoorók ii goów, de'eemáng mi kilooeé' mawaar.

⁹ Án xuumáng as tsaaxweelír taa aníng wa qaás miwa ót, nee múk tlákw oo iga giir miwa sláy.

¹⁰ Tlakuuse i pahh baraá tsaaxweelay'ín kuduú kilá', qoomár án bar aga waaraáhh ar saxareema.