WARA'AMI 140 - Ya/abtór hho' 1977

Firo as Baqmoó

(Wara'amtá Daudi)

¹ AAKOÓ MUNGÚ, án tu/áng dír múk tlakwe. /Iisáng dír múk xaraasla,

² kudá' muruú tlákw ngu qoomemeesá', inooín umuúqo daqto tlaahhi ngi qaminá'.

³ Tsifreeri'ine in tsu/uutiyá' adór dayshamoó qarkuú koóm, Baraá afer'in gár ti'iimiit a qarkuú dayshe.

⁴ AAKOÓ MUNGÚ, án de'eemáng gawaá dabaá múk tlakwe. /Iisáng dír kudá' xaraasla'a, kudá' adoo ngaa qoomesiye' ar aníng iwa dahhiya'.

⁵ Múk tlákw ina tsaaxweelírí qaasiyé' ngiri lu/iyé', nee him'e ngaa qaasiyé' adór baratsufaay wa aleeró, tsaaxweeli ngaa qaasiyé' ngiri lu/iyé' afaá loohi, as tiwa oohár wa slai.

⁶ AAKOÓ MUNGÚ una báw, “Kuúng an Mungúeé'.” Kuúng AAKOÓ MUNGÚ, afór firor'eé' iiárií qaaseek.

⁷ AAKOÓ MUNGÚ, kuúng an Mungúeé', kuúng an ba/amusmooeé' oo úr. Sagw'eé' una báq qoomár slaqwaraaro.

⁸ AAKOÓ MUNGÚ, heé tlakusmo tidá' i slai ma haniisaar, nee tidá' tlakw ta qoomemeesi ma ya/aamaar iwa tleehharut.

⁹ Kudá' aníng i harwediitá' nee i baliitá', muruudá' tlákw afer'in aaina' inooín ngi inki/i.

¹⁰ Gil'ór asla ngi i ku'ut, ki kwahhi baraá bohóngw iwa baloó ti'iitiaaká.

¹¹ Foolusmo gár hhoo' mingiwa sláy baraaká' yaamuuwo. Heé tlaákw ku giiri nee muruú tlákw as kuwa dahhi.

¹² A xuú' AAKOÓ MUNGÚ hee gun sakwasleemár ganaá' i tleehh. Nee múk liitlakwén gun hariimar'íni sláy.

¹³ Múk gan'amú koóm umuuwók gun xirfayemiis. Múk hotangw'ín ganaá' tan hoot dinkwa nee kuúng.