WARA'AMI 132 - Ya/abtór hho' 1977

Daa'ángw Xirif as Doó Mungú

(Daa'ángw ta daa'a'ati tawa Sayunír i tsa/a/an)

¹ AAKOÓ MUNGÚ, Daudi inslaweek, baraá slahh'amaayeerós tidá' aa saqiqitlini.

² Adoodá' lo'o ngira /aáy as AAKOÓ MUNGÚ, inós lo'o gana /aáy as kudá' Aleesleemuú koóm oo Yakobo.

³ Ina oó', “Aníng a dahaaká baraá dooeé', tam sleeme a tsa/amaaká gawaá qatanir'eé'.

⁴ Aníng gu'ute i otká, tam a mafisaaká,

⁵ ay dír hootaá AAKOÓ MUNGÚ ngay slaw, dír hootaá kuduú wakleelí oo /uuruú koóm oo Yakobo.”

⁶ Qaytsiít, kaangós una axaasaán baraá gixsár Efrata wa ale. Una araán baraá qamaá Yearimuuwo.

⁷ “Gusé', a dahaán baraá do'ós. A tumbarara'ataán dír kitángw ya'aawós ngi qamaamin!”

⁸ AAKOÓ MUNGÚ, sihhiitáng qwaláng amór do'ók kuduú hungu/umaawók, kuúng nee sandakamoó alqado, kuduú /uuruuwók gu laqaám.

⁹ Geeraharuuseerók ar saaliingw ka tuuntuki ar gan'amu. Mukók kudá' hhohhó' i baraa/ ar qwala/.

¹⁰ As Daudi sagadiyusmoowók waawutmoowók kudá' taa sliík ar di/i muu siaar.

¹¹ AAKOÓ MUNGÚ Daudi guna al'axweesantá ló' i oó', slám i alií ki/iiká al'axweesantadá' ngiwa warqeesi, iwa kaahi, “Baraá daaqaywoge garmoó wák u iwiitiís gawaá kitaangók oo waawuti'iima.

¹² Daaqaywók barnaxés alqador'eé' nee axweesantaeé', tidá' naa intsahhatís ngaa iialooeesiyé', daqaní daaqay'ín sleeme i iwiit, gawaá kitaangók oo waawuti'iima ay alhhe'eesay wasle.”

¹³ Asma AAKOÓ MUNGÚ yaamaá Sayuni gaa tsawaár, as iwa baraadá' i hotaá ay,

¹⁴ “Diirí an dir'eé' ar amohhoo' ar alhhe'eesoó koomaaká. Diirí an hoót asma aga watlakweés.

¹⁵ Muruú /aymaarós sleémeero oo baraadá' u tsuúq, narkuuteerós a aaxiís.

¹⁶ Geeraharuuseerós ar saaliingw ka tuntuuk ar ba/ama. Nee mukós kudá' hhohhó' nay baraa/iyá' ar qwala/.

¹⁷ Baraadae oo wák baraá xwaylár Daudiwo un waawutmoó úr tleéhh, tsa'aasi a amohhe'eés as kwe'eé' kwí naa imbalaáx.

¹⁸ Wakuuseerós an tuntuúk ar murekesaay, ala Daudi un slamángw waawiti'iimár i dahaás.”