WARA'AMI 116 - Ya/abtór hho' 1977

Sluufaay as Ba/ama

¹ Aníng AAKOÓ MUNGÚ un slaá' asma afor'eé' ga iiárií qamín, inós firor'eé' gaa axaás.

² Inós aníng iga iiárií qamín, gawaá adoorihe un fiririím baraá hotangw'eé' sleémeero.

³ Tsaxwaá gwa'ara ina harweeriyé', /aanta ngay da'ayuút, slahha'amu iga daawitamérár gaás.

⁴ AAKOÓ MUNGÚ nguri i /aa/amiím, “AAKOÓ MUNGÚ, na'amamís, hhintluueé' tu/eek.”

⁵ AAKOÓ MUNGÚ i haats gurhhooaro nee gana'amuwo, Mungúrén i gurtleemuú kón.

⁶ AAKOÓ MUNGÚ múk ta gaárií xuiiká gun de'én, qoomár aníng tiwa hara/untsín, inós ina ba/amís.

⁷ Muunuúeé', daxta aa yaandahhe'eés, asma AAKOÓ MUNGÚ iga hhooeemáy tleéhh.

⁸ Hhintlueé' ugwa hhákw afkú bohóngw wa ale, nee hhirhheeri'eé' iga fíts, iri de'én as mawa huú'.

⁹ Daxta an hoót ar adoodá' AAKOÓ MUNGÚ i slai, baraá yaamaá múk slaáf wa ale.

¹⁰ Aga mune si'iiká haratlintaooro tam qoomár niwa oó', “Aníng a baraá slahha'amkú úr!”

¹¹ Aníng ana ilawaáts ar dae, “Gár hee nguwa harahhiif i káhh.”

¹² AAKOÓ MUNGÚ gár ngur buu' a milá, muruudá' hhó' oo naa aníng i tlehhaahhiíti?

¹³ U sluufoó difaáír i haniís asma iga ba/amís, nee AAKO MUNGÚ un fiririím.

¹⁴ Al'axweesantadá' naa oó' dír AAKOÓ MUNGÚ, an boo/eés dír geeraá mukós sleémeero.

¹⁵ AAKOÓ MUNGÚ ga gár slahhaá' wa tsatsahhán, gwa'arár múk inós gwa haratlintii'.

¹⁶ AAKOÓ MUNGÚ, aníng a lawaalmoowók, án kuúng iga gwét baraá tseegmooro.

¹⁷ Ilahhooár sluufaay ngi kuúng i haniís, nee AAKOÓ MUNGÚ un fiririím.

¹⁸ Al'axweesantadá' naa oó' dír AAKOÓ MUNGÚ, an boo/eés dír geeraá mukós sleémeero,

¹⁹ baraá afenír Doó Mungú wa ale, baraá tla/ángw gixsár Yerusalemú wa ale. AAKOÓ MUNGÚ xirfayeemisaak!