WARA'AMI 114 - Ya/abtór hho' 1977

Daa'ángw Pasaáka

¹ Múk Israeli niwa tláy baraá yaamaá Misriro, xwaylár Yakobo niwa tleér yaamaá ayá heewo,

² Yuda tari xooroodá' hhoohhoo' ar Mungú, múk Israeli tari mukós oo kilá'.

³ Tlawtá Shamu giri ilaagóp, yaaér Yordani iri tsék!

⁴ Tlom'i nay gáwtí /akumiitiyé' adór gwanduú wa ale, tlom'aá ninakw nay /akumiitiyé' adór deeloó bee/aangw!

⁵ Aá tláwi, waáy masa góp? Yaaér Yordáni, ahaá kiíng ma'aay wa/asaro misa meér?

⁶ Tlóm'i, kuungá' waáy masa gawtí /akumité' adór gwaandawér wa ale? Tlom'aá ninákw, kuungá' asma milá masa gawtí /akumité' adór deeloó bee/ángw wa ale?

⁷ Kuungá' yaámu, daraaxaté', dír geeraá AAKOÓ MUNGÚ, eeít, dír geeraá Mungú Yakobo,

⁸ kudá' tlaa/a ga kwatiít iri tlahhasár ma'aay tleehhít, tla/aá uren giri tsinqa tleehh.