WARA'AMI 111 - Ya/abtór hho' 1977

Daa'ángw Xirfuú Mungú

¹ AAKOÓ MUNGÚ xirfayeemisaak! AAKOÓ MUNGÚ un sluufimiís ar muunuúeé' sleémeero. An haragwaá' dír múk slafingw'ín hhohhó' baraá alqaatír wa ale.

² Muruú AAKOÓ MUNGÚ i tlehhahhiiti ku urén, muruudá' ku ló'wa aldakuut nee mukdá' taa qwal/atís.

³ Umuúqo gár aa tleehhi i haats xirfuuwose nee uraywose. Nee gan'amuuwós i kumamiit kureeri sleémeero.

⁴ Inós aleesleemu guna haniís oo tlehhmi'iiwós kudá' waa/oo/amo kiwa inslasláy. AAKOÓ MUNGÚ i hhooeemá kón nee gurtleemuwo.

⁵ Mukdá' inós gu ilaiwawaá/ gun muruú /aymár i sláy. Alqadoorós dir'ine ga baloó gunqareesiiká.

⁶ Mukós gwa xu'utís aleesleemuú muruú urén kudá' i tlehhahhiti, qoomár yaamaá xoordu kiwa haniís tawa kooín

⁷ Tlehhmi'iiwós i ganaaiyá', slám ki insareehhi wasl, hara'ayarós bir nga oó' ar tsáp.

⁸ Hara'ayarós aqo in kumamít, alhhe'eesaywós i kaahh. Gana haniís ar looeema nee ar adór hhoohhoo'.

⁹ Mukós guna ba/amís, alqado gari tleéhh nee inooín ar baloó warqawaaká. Inós an kudá' hhoohhoó' nee kudá' ta da'ayumiti.

¹⁰ Ilaiwa/amér AAKOÓ MUNGÚ an iimu/úngw sagalooa. Múk adoorí ga /iimiís sager'ín i gwa/át. Xirfuuwós in kumamiit kureerisleém.