WARA'AMI 108 - Ya/abtór hho' 1977

Firo as wakuuse kawa arba/i

(Wara'amtá Daudi)

¹ Muunuúeé' ku amohhoó', Mungú, muunuúeé' ku amohhoó', a daá', kuúng uwa sa baraa/! Garmoó heewí tlawáng!

² Seése nee gidaandoóri, tlawaaré'! A daa'aán as da/aáw iwa daa/atuur!

³ AAKOÓ MUNGÚ, kuúng un sluufimiís tla/ángw múk wa ale. Aníng kuúng un xirfayeemiís ar daa'aangw baraá tla/ángw xoordu wa ale.

⁴ Asma sla'aarirók ar warqawaaká ka ur gawaá dooriwo, inkihhimuuwók ina hardáh ay gawaá hunkáy.

⁵ Mungú, kuúng xirfuút gawaá dooriwo! Xirfuuwók yaamu sleémeero ngi tuuntuuki!

⁶ Mukdá' ta sla' ba/amisek, ti alee/is ar dakók oo doó /iyáy, nee ti iiárií qas.

⁷ Mungú ina axweés iimír dirós tidá' hhoohhoo' wa ale. Ina oó', “Aníng nari baraá/, Shekemu ngway qasiís, tlapár Sukoti ngay qoomeés qasiisaro.

⁸ Gileadi a te'eé', Manase a kwe'eé', Efraimu, a baqmór sagw'eé', Yuda a hharte'eé' ar waawuti'iima.

⁹ Moabu a imper'eé' ar hamtlo, nee Edomu ugwa hharte'eéní qaás as tawa kwe'eé', aníng a waahhamiím as múk Filisti nguwa baál.”

¹⁰ Heé aníng i huúw a heemá ay dír gixsár slumtós taa gawdeés? Heé i geerahaár ay Edomu?

¹¹ Xáy Mungú, taa tawo meéri? A kumitakáhe tiwa koonda' nee boohharén ar askaári.

¹² Ti alee/is wakuuseerene, asma alee/isoó muu i gaa buiiká.

¹³ Mungú bir bartarén atén arba/ati a slawaán. Inós wakuuseerén ga yaamií kalaa/.