WARA'AMI 106 - Ya/abtór hho' 1977

Hhooeemaá Mungú dír Mukós

¹ AAKOÓ MUNGÚ xirfayeemisaak! AAKOÓ MUNGÚ sluufimisaak asma ku hhoó', asma sla'aarirós ar warqawaaká i baloó fakká!

² Muruudá' urén sleémeero oo AAKOÓ MUNGÚ aa tleéhh heé uingo gu aleesláw a heemá? Heé xirfuuwós alki/ituuwo gu aleesláw a heemá.

³ Múk amohhoó' a kudá' sakwasleemár ganaa' ngi boo/eemiisá', kudá' umuú daqto muruú qoóm gu tlehhiít.

⁴ Aníng inslawáng, AAKOÓ MUNGÚ, mukók bur hhooeemaawógí tlehhít, alee/isáng qoomár bar mukók ba/amiimís.

⁵ As kahhó' amohhooár mukók ngiwa ar, as kahhó' qwal/uú xooroorók nguwa saqwalalaa/, as kahhó' án nee mukók tawa alxirfuutaan.

⁶ Atén nee xwayliteérene tlakweema iga tleehhaán, iringeét aga tleehhaán, atén aga dakuusaán.

⁷ Taati'iirén qoomár iwa baraá Misri, waa/oo/amoodá' Mungú aa tlehhiít kaa gaári xuiiká. Yaareemaá sla'aarirók ar warqawaaká ngaa inslay'iiká. Ala Mungúdá' úr ngway aahhiyé' tawa afaá tlawtá Shamu dirii'i.

⁸ Ala tam adoorihe gina ba/amís as umuuwós, as aleesleemuuwós oo úr nguwa laqan.

⁹ Tlawtá Shamu gana iigahhaát iri kát, giri tla/angwdár waarahhaás adór yaamaá xaanxaay.

¹⁰ Gina ba/amís gawaá dabaá mukduú wakuusér wa ale, giri hiingeés dír /uuruú wakusmooine.

¹¹ Wakuuser'ín kari guú/ nee tlawi, tam panmo aa meetiiká.

¹² Mukós axweesantós gay haratlintií', daa'ángw kur xirfayeemisi kuri daá'.

¹³ Ala gadiyeédár Mungú ngari gaanslár gunqareesiyé', tam gurbu'ungós ngwa dani'iiká.

¹⁴ Ilatleeri giri eér tawa baraá darma, Mungú nguri iiara'ariyé' baraá xaanxáy wa ale.

¹⁵ Giri qáy tidá' na firni'i, ala tiqtír tlaakw gari dir'ín i huúw.

¹⁶ Baraá xafaywo muu Musa guri da/itá wa ár, tam Haruni, kudá' hhoohhoó' oo AAKOÓ MUNGÚ.

¹⁷ Qoomade yaamu nari gweeritiyé', Datani nguri gu/iyé', Abiramu nee daqtose ngway fooliyé'.

¹⁸ Eeharuuser'ín asla giri i /ét, mukdá' tlákw asla guri /ák.

¹⁹ Damár sahaábu kana tleéhh amór Horebu, murslaqatuú taa tleéhh kuri ilaiwawaá/ hariímár Mungú ló' wa ale.

²⁰ Xirfuú Mungú kuri warqeés, ar murslaqatuú adór damár gitsór /aay.

²¹ Mungúdá' gaa ba/amis ngwa gunqareesiyé', kudá' muruú waa/oo/amo gwa tleehh baraá Misrír wa ale,

²² gadiyér waa/oo/amo ar aa tleéhh baraá yaamaá Hamu wa ale, nee muruú dae tlaáq oo aa tleéhh dír tlawtá Shamu wa ale.

²³ Mungú iri oó', “Mukwí u hhaameés.” Ala Musa kilós sagadiyusmoowós kudá' aa tsawaár, ina tla/angwdi sihhiít as Mungú nguwa har'oohi kahhó' mingiwa hhaameés.

²⁴ Yaamudá' hhoohhoo' ngiri waaqaaiyé', asma al'axweesantá Mungú nga haratlinti'ii'iiká.

²⁵ Tana qununu/umamiít baraá heemaduú wa ale, tam AAKOÓ MUNGÚ ngwa iiárií qaasi'iiká.

²⁶ Mungú dakós guri tleés giri iigahhaát, lo'o gari /aáy iri oó', “I baraá xaanxáy i qwaareés.”

²⁷ Na/'ii'ín awa ta laqwaali, in tsiyayaáx baraá yaamaá múk xoordaá hatlá', ngiri diyaá/ baraá yaamu sleémeero.

²⁸ Aluuwo niri haragwaaiyé' dír múk Ba'ali gu sluufimiís baraá yaamaá Peoriro, fu'unaá ta gi'ií wa haniís ngiri /ayiyé'.

²⁹ AAKOÓ MUNGÚ nguri buhhtisiyé' ló'wa ale ar tlehhmi'ii'ín. Tiqtír pu/i iri /ét baraá tla/angw'ín.

³⁰ Ala Finehasi ina sihhiít, muu nee Mungú giri haraki/ís, Mungú tiqtidá' gari hingeés.

³¹ Tí kan inslaslay as ilaiwa/ameerós, iimír qoomadá' nee qooma sleémeero.

³² Mungú kuna buhhtís dír ma'aá Meribár wa ale. Musa slahh'amu guri sláy as inooín.

³³ Musa nguri buhhtisiyé' ló'wa ale, iri axweés ar sagawasle.

³⁴ Múk xoordaá hatlá' kwaa tsu/ii'iká, adoodá' Mungú inooín ngira hara'ayín,

³⁵ ala tina haragwaiyé' nee múk xoordaá hatlá', kiri dawaqaás nee múk xoordaá hatlá' tlehhmi'ii'ine.

³⁶ Gár taa tleéhh hariimár Mungú ló' wa ale, kari i tumbarara'amít, tlehhmuuwí iri tsaaxweeli tleehhiít dir'ine.

³⁷ Daaqay'ín nee dasuuín ngiri tsu/iyé', as kiwa ilahhooár wa hanmiisi dír neetlaame.

³⁸ Tseerér múk dakuús wásl kana tawo ku'uús, tseerér daaqay'ín nee dasuuín kudá' taa ilahhoár wa haniís dír muruú taa tleéhh hariímaár Mungú ló' wa ale, yaamu kiri tsixitúr áy.

³⁹ Gawaá adoorihe nari daba' tlakweemiisiyé' as tlehhmi'ii'ín, inooín naa inkihhimu wasleesiyé' dír Munguhe nari fuquusiyé'.

⁴⁰ AAKOÓ MUNGÚ iri qa/iít buhhtaawo gawaá mukós, kuri ló'wa mune duúx nee mukduú aalirós.

⁴¹ Giri afaweeriís dír xoordaá hatlá', as kahhoó' kiwa sawawiti'in nee wakuuser'ín.

⁴² kiri baramanuús nee wakuuser'ín, gadiyér /uuruú koom ngiri tleehhiyé'.

⁴³ Mungú mukós guna ba/amís daqtá yaariire, ala inooín gár naa tsawaariyé' a Mungú nguwa si'iya', niri ak hhané' baraá tlakweema.

⁴⁴ Ala tam adoorihe Mungú slahha'amuuín guna gaárí xuú', qoomár /aa/eeín ngiwa axaás,

⁴⁵ alqadoorós gana insláy as inooín, muneerós gari guú/, asma yaareemaá sla'aarirós ar warqawaaká.

⁴⁶ Kudá' sleémeero inooín ngaa oohine' hasángw wa ale, ngiri gurtlayé.

⁴⁷ Ti ba/amis, AAKOÓ MUNGÚ, Mungúrén, ti dinkwárí ki/is baraá múk xoordaá hatlae. Daqaní kuúng un sluufisaán as umuuwók kudá' hhoohhoó', atén tay xirfuutaán as xirfuuwók

⁴⁸ I xirfuuti AAKOÓ MUNGÚ, Mungú Israeli, iimír iimu/uungw wasle ay alhhe'eesay wasle! Muu sleémeero i ooi, “Amin!” AAKOÓ MUNGÚ xirfayeemisaak!