WARA'AMI 103 - Ya/abtór hho' 1977

Sla'aarír Mungú

(Wara'amtá Daudi)

¹ Muunuúeé', AAKOÓ MUNGÚ diidi'iimiseek! Umuúqo gár baraaeé' i diriia' umuú hhoohhoó' oo AAKOÓ MUNGÚ ngu diidi'iimis!

² Muunuúeé', AAKOÓ MUNGÚ diidi'iimiseek, hhooeemawós mi baloó gunqareesaar!

³ Tlakweemaeé' sleémeero ga gurtláy, tiqtir'eé' sleémeero gari hungu/uús.

⁴ Gwa'araro iga ba/amiís, inós aníng ina afkuú bohóngw wa ki/ís, iri tsuúq ar sla'aarirós ar warqawaaká nee gurtleemuwós.

⁵ Slafingw'eé' sleémeero gu aaxisa hhe'ees muruú hhoe. Iri masoombi'iimárií ki/is nari hoót adór gwareesi ir hotatiin.

⁶ AAKOÓ MUNGÚ kwaasleema gan tleehh ar loohír ganaá'. Mukdaádá' ta ngwaanjin gun hariimar'ín i ki/is male ale.

⁷ Loohirós gana laqán dír Musa. Tlehhmi'iiwós giri laqán dír múk Israeli.

⁸ AAKOÓ MUNGÚ i haats gurtleemu nee hhoeemawo. I gaanslár buhhabuhhiika, nee sla'aarirós i baloó warqeeraaka.

⁹ Ti i gilinká umuú deelooro, buhhtaawós i adá faakiyá'.

¹⁰ Taa muuxiiká ar adoodá' tlakweemarén wa hariim, taa buiiká ar qoomoó dakumisuurén.

¹¹ Adoodá' doori yaamu ngira tuuntukiyé', an adoodá' sla'aarirós ar warqawaaká ka úr dír mukdaádá' gu ilaiwawa/a.

¹² Adór da/aáw nee /uwa kir harasawén, an adoodá' tlakweemarén ngira kwaáhh giri saweés direne.

¹³ Adoodá' baabá na/'iiwós ngir gurtlatlay, an adoodá' AAKOÓ MUNGÚ mukdá' ngu ilaiwawa/á' ngur gurtlaatlay.

¹⁴ Asma inós ga xuu' adór atén ti diriiaan, nee ga insláy adór atén tar teerír tawo.

¹⁵ Slafingw hee a adór gitso, in slu/ubiibín adór /ayór baraá qaymo.

¹⁶ Asma fur'a in gawaawós ar fukukú' gari kaahás, tam didaádá' niwa ti'ít kay tsahhká.

¹⁷ Sla'aarír warqawaaká ar AAKOÓ MUNGÚ i deer ar iimír iimu/uungw wasle ay alhhe'eesay wasle, dír mukdá' ngu ilaiwawaá/. Gan'amuuwós in kumaamiit ay nángw naangw,

¹⁸ dír mukdá' alqadoorós ngi oohá', nee hara'ayarós ngi boo/eesá' ar inkihhmu.

¹⁹ AAKOÓ MUNGÚ kitaangós oo waawiti'iima gwaa qaás gawaá doori, nee in waawuti'ín baraá yaamu sleémeero.

²⁰ AAKOÓ MUNGÚ diidi'iimisaak kuungá' malaykeerós, kuungásingá' /uuruú koomá' nee axweesantós ngi boo/eemisá', axweesantá AAKOÓ MUNGÚ iiárií qaasaak.

²¹ Kuungá' sleémeero awa /uuruú koomá' gawaá dooriwo, AAKOÓ MUNGÚ diidi'iimisaak, kuungásingaá sagadiyuseerós awa sla'aarirós tlehhiitá'.

²² AAKOÓ MUNGÚ diidi'iimisaak, kuungádá' sleémeero taa tleéhh, umuúqo dír ti dir'a'a baraá waawuti'iimarose. Muunuúeé', AAKOÓ MUNGÚ diidi'iimiseek.