WARA'AMI 10 - Ya/abtór hho' 1977

Firo as Gan'amu

¹ Xáy AAKOÓ MUNGÚ, asma milá bareé aga sihhít amór saaw? Masa nahhát qoomár slahha'amko?

² Heé tlaákw baraá daara/angose, heé liitlaákw gun gusisín, xaa inós /aytarós ngu saki/.

³ Tlakusmo tin xirfayeemiis as ilatleeri tidá' tlakw ar baraá muunaáwós, nee heé qahusmo AAKOÓ MUNGÚ gun /oosliislín nee gun sii'.

⁴ Tlakusmo baraá daara/aangose Mungú gu leelehhiitiiká. Baraá inslawaywós sleémeerowo Mungú i kaahh.

⁵ Tlakusmo qooma sleémeero muruuwós i ya/aa/án. Inós ga baloó tsaahhiiká adór kuúng muu kur sakwasleemút. Wakuuseerós sleémeero gan waaqaaqaa'.

⁶ I baraá muunaáwósí kaahi, “Án a hhaslitaaká, ti hingeesiiká, slahh'amu u slawaaká ay nángw naangw.”

⁷ Gár baraá afkose aa hats a lu'umis nee fola nee /ayta. Gár kuwa inslaáhh a axweesanoó tlákw nee oo tlií/ gun axwees.

⁸ Baraá gixsaro adór ir hooti a gigdiingw, múk dakuúsár koomaaká gu gigdín guri tsuu/, i gigdín as heé liitlakusmo tawa sluqoorós.

⁹ I gigdín dír naaqór wa ale adór dirángw baraá mar'i. Heé liitlaákw gun haramamahhamiit as nguwa oohi, gun uhín ar tsaaxweeliirós, guri ar tláy.

¹⁰ Heé liitlaákw gun hara/akuut guri yaamií daahh, inós gun yaamií daahh ar gurtleemu wasle.

¹¹ Tlakusmo i baraá muunaáwós i kaahi, “Mungú aa sagaqwaár, ilaawós gaa tuntuúk, i baloó xuumisiiká.”

¹² AAKOÓ MUNGÚ, sihhiít, dakók tleeseek tlakusmo muxeek, liitlakuuse ma gunqareesaar.

¹³ Asma milá heé tlaákw mis kuúng waaqaqaa'? Asma milá mis baraá muunaáwós i kaahi, “Kuúng aníng i gaa laqká.”

¹⁴ Ala kuúng múk haleleamiít nee oo slahh'amuú koóm u xú', kuúng umuú daqto ta amohhe'és kiwa alee/is, liitlakusmo kuúng ugwa haratlintií'. Panaay alee/isaywók ngwa slayé'.

¹⁵ /Uuruú /aytuuse nee tlakuuse hhitiimeek, tlakweema sleémeero hingeeseek.

¹⁶ AAKOÓ MUNGÚ a waawutmo kureerisleém. Xoordaá ngu xua'aaká i qwaariyá' baraá yaamuwose.

¹⁷ AAKOÓ MUNGÚ, /aa/aá heé tsá' iga axás, kuri iiárií qás, kuri gurkwa/ás.

¹⁸ Kuúng panaay nee kudá' ta ngwaanjin in aleekal/aán as hariímar'ín kawa slay. Heé taa tléhh ar hhape miwa kumiít /aytaro.