WARA'AMI 1 - Ya/abtór hho' 1977

KITAÁBUÚ GEERA ( War 1—41 ) Qwal/amaayér Ló'

¹ Heé amohhoó' a kudá' axweesantá múk tlákw ga iiárií qamimaaká, slám i tlakuusér eeharahariiká, laqaá aa iwiitiiká dír dinku'uumár múk niquuse.

² Ala dabér AAKOÓ MUNGÚ gu sla'atimís, nee dabeedá' gan aldakuut tlaatla/aangw nee xweeraawo.

³ Inós tari adór xa'anoó taa haátl afaá tsiinqaá ma'aay, kudá' mamaá laqwaliím qoomár hariimarose, tam loo/orós i /otská. Heewí umuúqo gár i tleehhi i ya/aán.

⁴ Ala tlakuuse a adooriheeká. Inooín an adór muundoó fur'a ir tlatleer.

⁵ Gawaá adoorihe tlakuuse ka sakwasleemuut nee Mungú. Inooín ki paraatl dír dinku'uumár múk hotaa ganaa'a'.

⁶ Asma AAKOÓ MUNGÚ múk hotaa ganaá' gun xún baraá lohuine, ala múk tlakuuse loohir'ín gin húp baraá qwanaay.