Matayo 13 - Ya/abtór hho' 1977

Slaqsoó dahaasusmo

¹ Baalaadae Yesu ina dír doó wa tláy, iri iwiít afaá tlawi.

² Boo/oó yaariír oo muu guri i burumburiít, tam Yesu iri gawaá miringamoó i tsa/án, iri iwiít gawaadí alé. Boo/ayduú muu sleémeero iri afaá tlawtí sihhiít.

³ Yesu muruú yaariír guri dir'ín i axweés ar slaqsi'i, iri káh, “Dahaasusmo ina tláy iri dahaasíngw áy.

⁴ Nee qoomár iwa dahaasin, dahaasiingw bahh'alé ina paáhh afaá loohi. Tsir/o niri hardát, dahaasingwdá' guri /ák.

⁵ Dahaasíngw hatlá' ina paáhh gawaá tla/u, didaádár hhapér yaariir iwa kahh. Nari ti'iít ar gaanslaay, as hhapér bu'uut iwa kahh gawaá daanduú tla/uudae.

⁶ Nee tam tsee/amá iwa gwa/aát iri káh, asma dír dee/ár nguy sihhi i káhh.

⁷ Dahaasíngw hatlá' ina paáhh baraá laqaya', laqayaadá' niri uraarayé', dahaasingwdá' kuri tliíq.

⁸ Nee dahaasíngw hatlá' iri paáhh dír hhapér hho', iri laqwaál, oo wák tsiiru, nee oo wák mibeeri lahhoó', nee oo hatlá' mibeeri tám.

⁹ “Heé iiaá axamis gi koóm, i axaasi.”

Gár slaqsi'i kisar intsaahhatimisi

¹⁰ Eeharuuse nari hardát, Yesu guri beér, “Asma milá, mas axwés nee inooín ar slaqsi'i?”

¹¹ Yesu giri i ilawaáts, giri báy, “Kuungá' xu'uti aga sleeré' ar lu/aaroó waawuti'iimár doori kuwa xue'. Ala inooín xu'uti kaa slayká.

¹² Asma umuúqo heewo oo gár koóm, ka dook. Slám kay tlahhaasa hhe'ees. Ala umuúqo heewo oo gár koomaaká, tam tidá' niina i kon ka hayoh.

¹³ Gawaá adoorihe an gár nis axwees ar slaqsi'i nee inooín. Asma inooín barta xumiis, gár ta ara'ari i káhh, nee barta axamiis, gár ta axamiisi i káhh, slám gár ta tsatsahhan i káhh sleeme.

¹⁴ Nee /aymuú aarusmo Isaya aa boó/ dir'ine, kudá' iwa káh, ‘Axaasaro a axasá', ala a tsahha'aaká. Qaytsitaro a qaytsitá', ala a aanda'aaká.

¹⁵ Asma munér mukwí ka gawden, nee iiaawo i ak axamiisiaaká, nee ilaaín kaa gumamaá', as makawa ár ilaaine, matawa axaás iiaaine, makawa tsaáhh ar muner'ín, mindiwa warqayé', nee aníng miwa hungu/uús.’

¹⁶ “Ala kuungá' a múk amohhoó', asma ilaahúng ngi ga/ayá', nee iiaahúng i axamiisiyá'.

¹⁷ Án a kah, aaruusér yaariir nee gan'amuuse gana slá' arto tidá' kuungá' ta ga/eera', ala gaa aandiiká. Nee gari slá' axaasaro tidá' kuungá' ta axamisa', ala gaa axasiká.”

Gídaabár slaqsoó dahaasusmo

¹⁸ “Ala kuungá' slaqsoó dahaasusmo iiár i qaasaak.

¹⁹ Umuúqo heewo oo axweesantá waawuti'iima gaa axaas, nee gídaabárós birnga tsaahhiiká, kudá' tlaákw nin hardah, nee /aymuudá' taa dahaás baraá muunuú heé i alé guri hingees. Kwí an kudá' aa paahh afaá loohi.

²⁰ Nee kudá' aa paahh gawaá tla/u, an mukdá' axweesani gaa axaas, nee axweesantadá' kari ilaóh ar qwala/.

²¹ Ala dee/árú ta kon i kaahh, nee deelór tawa hooti ka ureeká. Slahha'amu binda ti'iít as axweesantadá', laqaá gusiisiingw, axweesantadá' kari máy.

²² Nee kudá' aa paahh baraá laqaya', an mukdá' axweesantadá' gaa axaas, ala daawitimér yaamu nee al/aymár daqaari'iima axweesantadá' gari tlíq, axweesantadá' iri laqwaliká.

²³ Nee kudá' aa paahh baraá hhapér hho', an mukdá' axweesantadá' gaa axaas, nee gídaabárós gari tsaáhh. Axweesantadá' iri laqwál baraá muner'ín i alé, oo wák tsiiru, nee kuqá' mibeeri lahhoó', nee oo hatlá' mibeeri tám.”

Sla/atá taa dahaás baraá qaymor angaáno

²⁴ Yesu gina slaqsoó hatlá' báy, iri oó', “Waawuti'iimár doori aa slaqamiimís nee heé dahaasíngw hhó' gwa dahaas baraá qaymoorós i alé.

²⁵ Qoomár xweeraawo tawa guú' sleémeero, wakusmooko wák nina hardáh, sla/a gari dahaás baraá tla/ángw angaáno, iri quútl.

²⁶ Qoomár angaáno iwa hapapaa'amiít nee iwa /uuntluumisi, sla/a sleeme iri geehhoouúr.

²⁷ Lawaalér heedaáduú qaymo loó' guri i daqeér, guri yaahás ar gidaabá, ‘Ahaá, baré kuúng dahaasíngw hhó' una dahás, ala sla/ataqá' i dáhh?’

²⁸ Inós giri báy, ‘Wakusmooko wák adoosíng gana tleéhh.’ Inooín kuri yaahaás, ‘A slá'a sla/atadá' ngiwa burumburtá awaan?’

²⁹ Inós iri oó', ‘Aasla'áy, mawaak, asma aluuwo dahaasingwdá' hhó' u sla/atá altu/uundá'.

³⁰ Mawaagáy sleémeero ay dír i uraaraya' nee dír qoomár bu'uungw ni xeer. Qoomár bu'uungo daqadá' aníng kaangw u oó' dír kudá' bu'uuma'a, sla/a ala tu/aak, daqada' ka dinkwár i tsegá', nee ka kwahhá' baraá asltí alé. Daqani angaano ku burumbudá' baraá meewér'eé' i alé.’”

Ilmoó haradaáli

³¹ Yesu slaqsoó hatlá' guri dir'ín i káh, iri oó', “Waawuti'iimár doori a slaqás nee ilmoó xa'anooko ta bay haradaáli, oo hee aa dahaás baraá qaymoorós i alé.

³² Nee ilmoodá' ku ló'wa niiná ta dahaasíngw hatlá' sleémeerowo. Ala binda ti'iít, ku ló'wa úr xaa'aá mamu sleémeero ba/a. Iri xa'aanoó úr tleehhiit. Tam tsir/o iri hardát, maray'ín giri gawaá haleemiidí tlehhít.”

Slaqsoó gár mikaáte ir sluufaasluf

³³ Yesu slaqsoó hatlá' guri dir'ín i káh, iri oó', “Waawuti'iimár doori a slaqás nee gár mikaáte ir sluufaasluf, ar /ameeni aa qás baraá puuruú, oo har afi qoomár deebedaá tsár, tam puuruúdá' sleémeero iri sluúf.”

Yesu adór ira axweés ar slaqsi'i

³⁴ Tí sleémeero Yesu gana axweés dír boo/oó múk i aleeró ar slaqsaay. Umuúqo gár aa dir'ín i axweesi, gana axweés ar slaqsi'i,

³⁵ as /aymuuduú aarusmo Isaya aa oó' iwa boo/i, kudá' iwa káh, “Aníng an axweés ar slaqsi'i, an tseé' ar afór ur tidaádá' taa luú/ iimír tlehhmuú yaamuú wa ale.”

Gídaabár slaqsoó sla/atá baraá angaáno

³⁶ Yesu boo/aay guri deelór i oó', iri dáh baraá doó i alé. Eeharuuseerós guri i daqeér, guri beér, “Slaqsaywú sla/atadá' baraá qaymo, gídaabárós atén i ooang.”

³⁷ Yesu iri oó', “Heedaádá' dahaasíngw hhó' gwa dahaas a Garmoó Hee.

³⁸ Qaymoodá' a yaamu. Dahaasingwdá' hhó' a mukdá' baraá waawuti'iimár Mungú i dirií'. Nee sla/atadár baraá qaymo a mukdá' tlákw.

³⁹ Wakusmoodá' aa dahaasi a Neetlaangw. Bu'uungw a alhhe'eesoó yaamu. Nee mukdá' bu'uúm a malayke.

⁴⁰ Ala adoodá' sla/a kar burumburin nee kari daa/ baraá asltí alé, an adoodá' bál deelór alhhe'eesoó yaamuuwo tleehharuut.

⁴¹ Garmoó Hee malaykeerós ngi ya/aaw, nee malaykeedá' mukdá' sleémeero aa dukuutse tleehhiit nee mukdá' tlakweema gaa tleehh, guri burumbút guri hingés baraá waawuti'iimár Garmoó Heewo.

⁴² Nee kuri kwaahh baraá asltá baloó gwaa'aaká. Nee didaádá' an dír /aa/ee nee sihhina' kiwa qirirtliimisi.

⁴³ Mukdá' gan'amuú koóm qoomaadae i gwa/aat adór tsee/amaá wa ale baraá waawuti'iimár Baabuúine. Heé iiaá axamis gi koóm, i axaasi.”

Slaqsoó peésár taa luú/

⁴⁴ “Slám waawuti'iimár doori a slaqás nee peésár taa foól baraá qaymorka. Nee hee ngiwa ár, gari luú/, iri tláy ar qwala/, nee muruuwós kudá' sleémeero i kon dír do' guri weerisár áy, nee qaymoodá' gari tlaáxw.”

Slaqsoó miisli

⁴⁵ “Slám waawuti'iimár doori a slaqás nee heé halaanu'uumár tlehhiít, oo miislír hhoohhoo' ga leelehhiít.

⁴⁶ Nee inós miislirka wák ngiwa ár, ar tlaxór ur, iri tláy, muruuwós kudá' i kon guri weeriís sleémeero, miislidá' gari tlaáxw.”

Slaqsoó baratsufaay

⁴⁷ “Slám waawuti'iimár doori a slaqás nee baratsufoó taa kwaáhh baraá tlawtí ale. Nee baratsufaydá' siyoó umuúqo daa'awi ngway ohín.

⁴⁸ Nee baratsufaydá' iwa haáts, kuri uuruúx afaá tlawi. Tari yaamí iwiít, siyoódá' kuri partliít baraá baratsufaydá' wa ale, kuri amohhe'eés. Ala siyoódá' tlákw kuri kwaáhh.

⁴⁹ Adoorí an adooda' tleehharuut bál deelór alhhe'eesoó yaamuuwo. Malayke nin hardát, nee giri partlít kudá' tlakw amór saáw i alé dír kudá' gan'amuú kooma'a.

⁵⁰ Nee kudá' tlakw kiri kwaahh baraá asltá baloó gwaa'aaká. Nee didaádá' an dír /aa/ee nee sihhina' kiwa qirirtliimisi.”

Slaqsoó daqaari'iimár /aben nee ar qaren

⁵¹ Yesu giri yaahaás iri oó', “Tí sleémeero aga tsahhí'i?” Tari oó', “Eeít.”

⁵² Yesu giri báy, “Gawaá adoorihe umuúqo intsaahhatusmoó hara'ayár Musawo, oo sagalooá waawuti'iimár doori ga koóm, a slaqás nee heé do' loó', oo muruuwós kudá' /abén gu hanmiís, nee kudá' qarene.”

Yesu kuwa Nasaretír wa sií'

⁵³ Yesu slaqsi'iiká' axweesanto ngiwa hhe'eés, iri ti'iít iri tláy.

⁵⁴ Nee iwa amór ayaawós i hardáh, muu guri intsaahhatimís baraá doó saalingw'ín wa ale, tam mukdá' iri waa/oó/, tari káh, “Kwí sagalooarí dír ngiwa sláy a diimá, nee muruuwí oo xuawaslén oo i tlehhiiti.

⁵⁵ Kwí a garmoó heedá' maraá tlehhahhítaáke? Nee aayoorós a tidá' ta babáyke Mariamu? Hhaeewós awa daaqaay a Yakobo nee Yosefúwoóke, nee Simoni nee Yuda?

⁵⁶ Nee hhaeewós awa dasu i ayaarén i dirii'iíaáke? Ala kwí tí sleémeero amór ngiwa sláy a amá?”

⁵⁷ Yesu kuri insareéhh. Yesu giri báy, “Aarusmo dír kuwa ilaiwawa/iiká i káhh, aqo har dír yaamuuwós nee dír do'ósuú kilá'.”

⁵⁸ Ala inós muruú xuawaslén oo yaariír gwa tleehhiiká amoodae, asma inooín kuwa haratlinti'iiká.