Marko 6 - Ya/abtór hho' 1977

Yesu kuwa Nasaretír wa sií'

¹ Yesu nina tláy amoodá' wa ale iri kií/ ayaaín, nee eeharuuseerós ti koná'.

² Bál deelór hungu/umaawo múk yaariír guna intsaahhatimís baraá doó saalíngw wa ale. Inooín intsaahhatimisuuwós kuri waa/oo/amór wa ár, tari oó', “Kwí amór tí sleémeero ngiwa sláy a amá? Sagalooarí taa heewí haniís a sagalooár adoomá? Nee muruú xuawásl kwí i tlehhiiti a milá?

³ Kwí a kudá' oo maraá tlehhahhitakáhe? Aayoorós a Mariamu, hhaeewós a Yakobo nee Yose nee Yuda nee Simoni. Hhaeewós awa dasu a kudá' ayaarén i diriiá'áke?” Kuri insareéhh.

⁴ Yesu giri báy, “Aarusmo dír kuwa ilaiwawa/iiká i káhh, aqo har dír ayaawós nee dír mar'eefoowós nee dír múk dooín.”

⁵ Ala inós gár aa tleéhh iri káhh baraá muruú xuawaslene baraá ayaadaádae, aqo har tiqtuusér niina gana dabáy qaás, gari hungu/uús.

⁶ Inós iri ló'wa waa/oó/ as haratlintaaor'ín wasle. Yesu iri baraá inslaawaydá' wa hi'iimiít iwa intsaahhatimisi.

Eeharuuseedá' mibá nee tsár kawa ya/aáw

⁷ Eeharuuseedá' mibá nee tsár gari ateét gari iimu/ún ya/abitooro tiwa tsár wa koomakona', gari /uuruú i haniís oo neetlaame hingeemis.

⁸ Giri hara'ayín gídaabá, “Bar aa'aá keerá' gaa ma huuwara', aqo har hhara kilós. Muruú /ayma mu huuwara', tam tlakwaay, tam peésár baraá tlin'i.

⁹ Ya/ata' dahaasaak, inqwar mu tsadér wa huuwara'.”

¹⁰ Giri báy, “Umuúqo diiro bara hardaté', dír doó wák wa hootaak ay dír deelorhúng i fak didae.

¹¹ Dír kuungá' tunduwa ilaohiiká, nee axweesantahúng kawa slaiká axaasaro, quutlé', didá' geexawaak, teeri ka alí kukuá', adór gurbua dir'ine.”

¹² Tari tláy Ya/abtór hho' ar Mungú kawa alki/iiti gídaabá muu iwa hhu'u'un.

¹³ Neetlaamér yaariir kari hingeemiís, tiqtuusér yaariir kari sliík di/itár alé, kari hungu/uumiís.

Gwa'arár Yohanudá' Baatimaamiís

¹⁴ Waawutmo Herode iidíguuwí guna axaás, asma iidíguú Yesu umuúqo diiro kwaa axaás. Muu i kaahi, “Yohanudá' Baatimaamiís naa waasleé/, gawaá adoorihe /uuruuwí in baraawós wa gadiyuus.”

¹⁵ Bahh'alé ta kaahi, “A Eliya.” Bahh'alé ta kaahi, “Kwí a aarusmo adór aaruuseedár bál geera.”

¹⁶ Ala Herode tí ngiwa axaás iri oó', “Heesíng a Yohana kudá' naa saga tsaát nina waasleé/.”

¹⁷ Asma Herode inós muu guna ya/aáw, Yohana kuri óh, kuri tseék. Gár adoorí ngisa tleéhh a as Herodia, harér Filipo hhiyoó Herode, tidá' Herode aa duúx.

¹⁸ Asma Yohana Herode guna báy, “Adoosíng i gan'aaká ar harér hhiyaawók kawa dux.”

¹⁹ Herodia loohi gana leelehhít ar Yohana ngur gas, ala gaa sleeriiká.

²⁰ Asma Herode Yohana gu da'ayumiit, asma ga xuu' gídaabá a heé gan'amká koóm, oo hhoohhoó' dír Munguhe. Inós guna amohhe'eemiís asma mukuwa gaás. Axweesantá Yohana gana axamiís ar qwal/amaaye, ala axweesantadaádá' inós guri sakwasleemút.

²¹ Herodia deelór pa/aangw nguwa sleér, an deeloodá' ur ar xwaylár Herode kawa inslaslay. Baldae Herode múk yaariír guna dír do'ós i dahi'ís, waawituú baraá gixsadár ayaawós nee múk urén oo askaári, nee múk urén oo yaamaá Galilaya.

²² Dasír Herodia niri hardát iri nét, Herode guri qwala/ás, nee mukdá' didí dirií' sleeme. Waawutmo Herode dasiidá' gari báy, “Án firiimáng umuúqo gár ta sla'a, án ngi haniís.”

²³ Lo'o gari huúw iri oó', “Umuúqo gár ta sla'a ngi haniís, tam waawuti'iimar'eé' qasisaro a ya/aám.”

²⁴ Dasi iri tleér ay amór aayir'ín, gari yaahás gídaabá, “Gár ni firiim a milá?” Aayo gari beér, “Ságw Yohanudá' Baatimaamiís na firiimeek.”

²⁵ Hamtidár kilá' dasi nina kí/ ar gaanslaay ay dír waawutmo, guri firiín gídaabá, “Gár ni slaa' a ságw Yohanudá' Baatimaamiís hamír kilá' baraá xooslmoó i qaasang.”

²⁶ Waawutmo iri gurhaamuút ló'wa ale. Ala si'ima gaa aslayká as lo'odá' aa huúw, nee as mukdá' didá' wa /ayiím.

²⁷ Hamtidár kilae waawutmo askaarmo guri ya/aáw ságw Yohana kuwa leehhi. Askaarmo iri tláy baraá doó tseegamo. Yohana guri saga tsaát,

²⁸ sagós nguri huúw ar baraá xooslmo, guri dír dasiidí haniís. Dasi guri dír aayir'ín i hanís.

²⁹ Eeharuusér Yohana iidíguuwí nguwa axás tari tláy, slaqwtá Yohana kari leéhh, kari foól.

/Aymisír múk kumér kooán

³⁰ Yesu ya/abuuseerós guri i burumburít, tidá' sleémeero ar naa tleehhiyé', nee tidá' taa intsaahhatimís kari dirós i alki/iít.

³¹ Giri báy, “Qwalaasé' kuungá' kiloohúng amór muu iwa kahhi. Hungu/usé' gár niinawe.” Asma múk yaariír i hardarah nee kuqá' i tlatláy, inooín pa/ángw tar /ayin sleeme iri qwaár.

³² Tari tláy gawaá miringamo inooín kilooín amoodá' muu iwa kahhi.

³³ Tawa tláy, múk yaariír giri tsaáhh, tari amoodí tláy ar gaanslaay ar ya'a' baraá gixsadu sleémeero, tari giirín hardahamuuwo.

³⁴ Inós iwa gawaá miringamoó wa aweér, múk yaariír guri ár, guri gurtláy, asma ngiwa ár a adór bee/ángw de'eamusmoó koomaaká. Muruú yaariír guri intsaahhatimís dir'ín i alé.

³⁵ Looa iwa niinawuúr eeharuuseerós guri i daqeér guri beér, “Yaamuukaáká' a darmuú tawo. Hám daxta looa aa dát,

³⁶ mukwí geemaweek i tlay, ta áykwí ki/i, nee baraá gixsadu, asma ta /aymár ay.”

³⁷ Yesu giri báy, “Muruú /aymár i haniisaak kuungá'.” Kuri báy, “Muruú /aymár shilíngi tsiire tsár un tlaxór awána kway haniisaán kuwa /ayi?”

³⁸ Giri yaahaás, “Kuungá' mikaáte ka koonda' a magá'? Tlawsé' araak.” Arto kawa hhe'eés tari oó', “Mikaáte kooán nee siyoó tsár.”

³⁹ Giri báy, “Muu iwitisaagáy gawaá gitsór naa/, múk niiná dirqá', kuqá' dirqá'.”

⁴⁰ Tari iwiít ar daqooraay, diirí mibeeri kooán, tiqá' tsiiru.

⁴¹ Mikaáteedá' kooán nee siyoódá' tsár giri óh, iri gawaá doorí qaytsiít iri sluufiís, mikaáteedá' gari qasmiís dír eeharuuseerós i alé kawa múk i hanmiisi. Nee siyoódá' tsár guri qasmiís dír muu sleémeero.

⁴² Muu sleémeero iri /ayín tay aáx.

⁴³ Eeharuuse katatoó mibá nee tsár guri dalá/ parhheemaá naa meeti'i dír mikaátér wa ale nee siyó.

⁴⁴ Múk aa /ayin sleémeero a kume kooán, hhawaate kilooín.

Yesu i gawaá tlawtá wa hi'iimiit ar ya'a'

⁴⁵ Eeharuuseerós gari báy, “Tsa/amé' gawaá miringamoó i alé, geerí hi'iité' ay gayuú Betsaida.” Qoomaadae inós i deelór kah dír boo/ayduú múk i alé.

⁴⁶ Deelo ooaro ngiwa hhe'eés, iri firór áy gawaá tlooma.

⁴⁷ Tsiindo niwa xayé', miringamo i baraá tla/ángw tlawi. Yesu a kilós amór yaamaá kaahare.

⁴⁸ Eeharuuseerós gari ár i baraá tlawtá wa daawimít, asma miringamo gan'aasa ga ya/a/anká asma fur'a gu ila/aán. Qoomár ságwlooa tleemu iwa xeér, inós i gawaá ma'áy wa hi'iimiit, i amor'ín káy. Qoomár iwa lak waaraahhi,

⁴⁹ kuwa ár i hi'iimiit gawaá ma'áy wa ale, inooine a hhantamo. Tari uú'.

⁵⁰ Asma inooín sleémeero inós kuwa ár, tari amoqwaár. Inós giri báy, “Ma amoqwaqwadiimara', hee a aníng. Dae mawaak.”

⁵¹ Iri gawaá miringamooín kudí tsa/án, fur'a iri xaslít. Tari waa/oó/ baraá muner'ín i alé,

⁵² asma kaa tsaahhiiká gídaabár mikaáteedá' a umós, asma muner'ín adoodá' gaa ya/aandiiká.

Tiqtusmoó Yesu aa hungu/uús Genesaretír wa ale

⁵³ Tlawi kingiwa faák tari hardáh yaamaá Genesareti, miringamo kuri tseék.

⁵⁴ Inooín tindiwa aweér gawaá miringamoó wa ale. Yesu kuri tsaáhh nee muu.

⁵⁵ Tari haratláy sleémeero, yaamuudá' kiri harweér, tiqtuuse kari huwahuúw umuúqo dír kwi axaasi.

⁵⁶ Nee umuúqo dír aa kay baraá gixsaduuwo nee tla/ángw ayko tiqtuuse kana dinkwár i qaás. Kuri harhheehhe'eemiís kuwa kwatiiti tam pasltá inqwaarirós. Nee kudá' sleémeero ngwa kwatimiitiye' tari hungaaguú/.