Marko 3 - Ya/abtór hho' 1977

Heé dakós aa sol'oot kuwa hungu/uús

¹ Yesu iri dáh malé alé baraá doó saaliingw, nee baraadane heeko i deer oo dakós aa sol'oot.

² Kuri gigidín gídaabá kuwa ari, áx heedaádá' gu hungu/uúsi deelór hungu/umaawo, as kuwa sakwasleemuuti.

³ Heedaádá' dakós aa sol'oot guri báy, “Baraá tla/aangw i sihhiiteek.”

⁴ Giri yaahaás, “I hariínda deelór hungu/umaawo gár hhoo' tleehhamooro laqaá gár tlaakw, hee hungu/usa Iaqaá gaasa?” Tari xasliít.

⁵ Iri gurhaamuút asma gawdeemaá muner'ín, giri ilá i duxún bihhe sleémeero ar buhhta, heedaádá' guri báy, “Dakók gan'aaseek.” Inós dakós guri gan'aás, dakós iri hunguú/.

⁶ Hamtidár kilae múk Farisayo iri ti'iít, ta kwasleemár tlehhiit daanduú Yesu dinkwa nee múk Herode, adór kur gaasi.

Boo/oó afaá tlawi

⁷ Yesu tiri paraátl, inós nee eeharuuseerós, iri tláy amór tlawi, kuri eehaár nee boo/oó yaariír oo muu. Mukwí sleémeero amór i dahhi a amór yaamaá Galilaya nee yaamaá Yudea,

⁸ nee gixsár Yerusalemu nee yaamaá Idumaya nee gayuú Yordani nee bihhér Tiro nee Sidoni. Mukwí Yesu guri i daqáy asma iidíguú muruudá' sleémeero aa tlehhiít, kwaa axaás.

⁹ Eeharuuseerós gari báy, “Miringamo tseweesare' dir'eé' ale, asma boo/aay miwa tliíq.”

¹⁰ Asma múk yaariír guna hungu/uumiís, tam sleémeero awa slahha'amuú dimbadimbé ngu koomá' kuri i tseewúy ar tliqa as kuwa kwatitár wa slai.

¹¹ Nee mukduú neetlaame aa eér umuúqo siiwaro Yesu burkwa ár, in tumbarara'aamiit dír geeraawós i alé, tan tseeamín ta kaahi, “Kuúng an Garmoó Mungú.”

¹² Giri ló'wa hara'ayín gídaabá, “Án mi xu'utisara'.”

Tsawdór eeharuusér mibá nee tsár

¹³ Yesu iri tsa/án gawaá tlooma, kudá' inós aa slaá' giri ateét, kuri i daqáy.

¹⁴ Múk mibá nee tsár guri tsawaár as tawa dinkwa nee inós, nee nguwa ya/aawi alki/ituú axweesantá Mungú wa ale,

¹⁵ slám /uuru nguwa kona' oo neetlaame hingeemis.

¹⁶ Eeharuuseedá' mibá nee tsár gana qaás. Inooín a kuká', Simoni, kudá' aa umuú hatlá' i tsaát tawa Petro,

¹⁷ Yakobo garmoó Sebedayo, nee Yohana hhiyoó Yakobo, giri umuú hatlá' i tsaát, a Boanerge, gídaabárós a daaqoó tsimaahhuuse,

¹⁸ Andrea, nee Filipo, nee Bartolomayo, nee Matayo, nee Tomaso, nee Yakobó Alfayo, nee Tadayo, nee Simonudá' yaamuuwós aleeslaáqw.

¹⁹ Nee Yuda Iskariote, kudá' Yesu gu sakií/.

Yesu nee Beelsebuli

²⁰ Aluudae Yesu iri waátl amór do'. Boo/aay iri burumburiít malé alé, tam inooín pa/ángw muruú /ayma kur /ayi kwaa slayká.

²¹ Múk dooín iidík nguwa sláy iri ti'iít as kuwa oohi, asma ta kaahi, “Fuquraangós aa /aarúy.”

²² Nee intsaahhatuusér hara'ayár Musa, tidá' naa amór Yerusalemú wa awet ina kát, “Inós kwaa áy nee Beelsebuli, kudá' úr oo neetlaame, nee i neetlaamér gusiisín ar /uuruuwós.”

²³ Muu guri ateét guri i axweés ar slaqsi'i, iri oó', “Neetlaangw kilós hingeesaro ti aleesláya?

²⁴ Nee waawuti'iima birti tlaampa'aamís kilós ale, waawuti'iimadá' sihhiita ga aleesleeraaká.

²⁵ Nee do' birti tlaampa'aamiis kilós ale, do'dá' sihhiita ga aleeslayká.

²⁶ Nee Neetlaangw bar inós kilós taa i haratláy bir slaaqw, sihhiita ga aleeslayká, alá iqo harki/isoó kón.

²⁷ “Heé dahamu gu aleesláw baraá doó heé /uuruú koóm i kaahh, xoosla gay hayoh, barnaxes heedaádá' /uuruú koóm gwa tseegiiká ala alé, daqaní do'dá' gway sangw /awa/awín.

²⁸ “Án a kah, tlakweema sleémeero awa muu ki gurtláy, nee /ooslislingw'ín sleémeero oo Mungú kuwa /ooslislin,

²⁹ ala heé Qeeruú hhoohhoó' gwa /ooslin, tlakweemaawós ki baloó gurtlayká, aqo tlakweemaawós nin iwiwitiyá' daanduuwós wa ale ay kureeraá kureér.”

³⁰ Inós adoorí gana oó' asma adoodá' inooín tawa kaahi, “Neetlaame gwa eér.”

Hha'aá Yesu nee aayír'ín

³¹ Aayoorós nee hhaeewós awa daaqaay tari hardáh, tari tsee/áy sihhiít, hee kuri ya/aáw inós nguwa ateeti.

³² Nee boo/aay aa iwiít, inós kwa harweér kuri báy, “Ga/aaweek, aayoorók nee hhaeewók ta tsee/áy dirii', ta kuúng leelehhiit.”

³³ Giri i ilawaáts iri oó', “Aayor'eé' nee hhaee'eé' a ín heemá?”

³⁴ Mukdá' aa iwiit guri i qaytsiít, kudá' gwa harweer bihhe sleémeero, iri oó', “Ga/aawaak, aayor'eé' nee hhaee'eé' a kuká'.

³⁵ Asma umuúqo heewo oo sla'aarír Mungú ga tleéhh, kudá' an hhiyaaeé' nee hho'or'eé' nee aayor'eé'.”