Marko 15 - Ya/abtór hho' 1977

Yesu i geerá Pilato

¹ Looa niwa tleér matlatleero hamtidae geeraharuusér uren ar saalíngw múk Yahudi kwasleema kari tleéhh nee bariisee, nee intsaahhatuusér hara'ayár Musa, nee mukdaáduú kwasleemár wa hariím sleémeero oo kwasleemár ur. Yesu kuri tseék, kuri huúw, kway dabaá Pilató i qaás.

² Pilato guri yaahaás, “Kuúng a Waawutmoó múk Yahudíro?” Inós guri báy, “A adoosíng ta kat.”

³ Geeraharuusér uren ar saalíngw múk Yahudi ngwa sakwasleemuutiyé' muruú yaarire.

⁴ Pilato guri malé yaahaás, “Mas ilawatsaká? Muruú yaariír oo tuwa sakwasleemuuti u ga/eéraáke?”

⁵ Ala Yesu aa malé ilawatsiiká. Tam Pilato gay waa/oo/amór wa ár.

Kwasleemár Yesu kuwa gaasi

⁶ Umuúqo deelór ur ar Pasákuwo heé wák baraá múk taa tsegiiti kun gweer, kudá' muu i gweerár wa slai.

⁷ Heeko ta bay Baraba kuna tseék dinkwa nee múk hatlá', asma tana slaáqw asma axweesantá serikáli kawa sií', muu kuri tsuú/.

⁸ Boo/oó muu niri hardáh dír Pilato, kari iimu/ún kawa firin ngiwa tleehhi adoodá' aa intsaáhh.

⁹ Pilato iri ilawaáts iri oó', “Xáy, a sla'á'a Waawutmoó múk Yahudi nguwa gweer?”

¹⁰ Asma inós gana geerí xuú' gídaabá geeraharuusér uren ar saalíngw múk Yahudi kuna huúw amoodí alé asma da/itá tawór wa ale.

¹¹ Ala geeraharuusér uren ar saalíngw múk Yahudi boo/oó muu gway fuqunáy qás gídaabá Baraba kungu gweeri.

¹² Pilato giri báy malé alé, “Ala kwí ta babeera' a Waawutmoó múk Yahudi adór ngu laaq?”

¹³ Tari tseé' ta kaahi, “Kikiieek gawaá msalaába.”

¹⁴ Pilato ngiwa yaahaás gídaabá, “Gár aa tlakweés a milá?” tari kumiít tseeoro ló'wa ale gídaabá, “Kikiieek gawaá msalaába.”

¹⁵ Pilato Baraba guri gweér, asma adoodá' muu i slai gana slaá' tleehhamooro. Yesu kuri muúx ar qaw'i, guri haniís kuwa kikii'i gawaá msalaábár i alé.

Askaári i Yesú niqiín

¹⁶ Askaári guri húp ay baraá boómár ur. Askaári sleémeero kari didí burumbuúr.

¹⁷ Kuri tsiitiís ar inqwaarír siira/aat, slamángw laqaya' kuri tlaatlaáw kuri qaás gawaá sagós.

¹⁸ Kuri taaqweemiís ta kaahi, “Laawaay, Waawutmoó múk Yahudi.”

¹⁹ Kuri saga muúx ar daa'a, kuri i tsuuqún ta geeraawós i tumbarara'amiít, as ilaiwa/amer'ín kawa laqaqan ar niqaay.

²⁰ Niqaywo kuwa hhe'eés, inqwaarirós tidá' siira/aat kari hingeés, kuri tlabaawós i ki/ís. Kuri tsee/áy huúw as kuwa kikiiár ay gawaá msalaábár i alé.

Yesu kuwa kikií' gawaá msalaába

²¹ Loohiro heeko wák oo baraá gixsár káw kuna /uurutís as msalaabár Yesu ngiwa gagaari. Umuuwós a Simonú ayaá Kirene, baabuúín Iskanda nee Rufo.

²² Yesu kuri huúw ay dirka ta babay Golgota, gídaabárós a “Fartá saga”.

²³ Muruuko wahaangw oo taa garka ta bay manemánér i qaás, kuna mak haniís nguwa wahi, ala guri sií'.

²⁴ Kuri gawaá msalaábár i kikií'. Inqwaruuwós kuri qasmiís ar loohír adór mugú', as gídaabá umuúqo heewo gár i slay a umós.

²⁵ Kuwa kikií' a looár tám.

²⁶ Gadá' kusa sakwasleemuút kaa didí gooín ar /aymi'iiká', “Waawutmoó múk Yahudi.”

²⁷ Malguusér tsár nee inós kina alkikií' gawaá msalaabadu, kookoo dakós oo doó /iyáy, kuqá' dákw doó basáy. [

²⁸ Gooi iri bó/, tidá' kah, “Kuna tla/ángw tlakuusér i harafaár.”]

²⁹ Múk yaamuudae waraáhh Yesu guri tloqomiís, ta hara sager'ín muumukuumiis, ta kaahi, “Aháee, kuúngudá' oo Doó Mungú gu feé/, kway tléhh baraá deelo tám i alé,

³⁰ kár ti /is gimáy, ti aweeris gawaá msalaábaro.”

³¹ Geeraharuusér uren ar saalíngw múk Yahudi sleeme kuna niqín, inooín dinkwa nee intsaahhatuusér hara'ayár Musa, ta kaahi, “Awa hatlá' gina /iimiís, ga/aaweek, kilós /iisaro ti aleeslayká.

³² Kristo, Waawutmoó múk Israeli, daxta ni aweeri gawaá msalaábaro, atén ku araán, daqaní u haratlintiaán.” Tam mukdá' nee inós taa alkikií' sleeme inooín kuri tloqomiís.

Gwa'arár Yesu

³³ Looár lahhoó' iwa xeér, iimi iri gíp yaamu sleémeero ay looár gwaleél.

³⁴ Looár gwaleele Yesu iri tseé' ar afór ur, “Eloi, Eloi, laama sabaktani”, gídaabárós a “Mungúeé', Mungúeé', misa meér?”

³⁵ Múk dír iisaapaydá' wa axamiís iri oó', “Ga/aawaagáy, i Eliyá ateetín.”

³⁶ Heeko wák niri amorqá' wa ta'aín, warqamooko guri tikiís ar ma'aá qarqará' awa taa tsoó/ baraá na/'aá xaaí wa ale, guri siíhh gawaá afkwá daai, Yesu guri wahaás ar warqamoodá' i kaahi, “Mawaagáy, daxta a araán, Eliya gu aweeriísi?”

³⁷ Yesu iri tseé' ar afór ur, iri gwaá'.

³⁸ Inqwaarír baraá Doó Mungú, ar do' gwa qasis, iri tla/a feehhít gawtá wa ale ay baraay.

³⁹ Geeraharusmoó askaári, kudá' inós gura qon aa geeraawós i sihhiit, adoodá' ira gwaá' ngiwa ár, iri oó', “Ar ló' heewí a tsuwá Garmoó Mungú.”

⁴⁰ /Ameenarka amorqá' saáw wa xuumiis i deer. A ín Mariamu Magdalene nee Mariamu aayor'ín Yakobodá' niiná nee Yose, nee tooka a Salome.

⁴¹ Kuká' an kudá' nee inós ti komkakoomá' Galilayaro, nee ngu alee/iimamisá'. Nee /ameenár hatlá' ar yaariir i deer, tidá' nee inós naa al Yerusalemú i tsa/ane'.

Foolár Yesu

⁴² Baldá' a deelór tiwa amohhe'eemisiya', asma loaytleérós a deelór hungu/uma. Qoomár tsiindowo.

⁴³ Yoséfú Arimatayár daáhh nina hardáh. Inós a heé ilaiwa/amér koóm oo doó kwasleema, nee inós sleeme i waawuti'iimár Mungú daamaarán. Inós guruuwós guna gawdeés iri dáh ay amór Pilato, slaqwtá Yesu gari firín.

⁴⁴ Ala Pilato gari waa/oo/amór wa ár asma iwa tseewa gwaá', geeraharusmoó askaári guri ateét, gway yaahaás iri oó', “Aaqo gwaái?”

⁴⁵ Geeraharusmoó askaári iwa oó', “Aa gwaá'”, Pilato iri ya/án slaqwtá Yesu ngiwa haniisi.

⁴⁶ Yosefu inqwaarír /awaak gari tlaáxw, guri gawaá msalaábár wa aweeriís, guri untsuús ar inqwaaridá', guri qaás baraá baa'ár taa foól gawaá tlaa/a. Tlaa/ár hatlá' gari gwangwaraá' gari afkuú baa'ár ar tuntuúk.

⁴⁷ Ín Mariamu Magdalene nee Mariamu aayór Yose didá' Yesu kway qaás kari xuuxuú'.