Marko 13 - Ya/abtór hho' 1977

Fee/ár Doó Mungú kaa geerí oó'

¹ Qoomár Yesu niwa baraá Doó Mungú wa ti'imiiti, eeharusmoowós oo wák guna báy, “Intsaahhatusúmo, ga/aaweek tlaa/eeká', nee adór do'wí kura tleéhh.”

² Yesu guri i ilawaáts guri báy, “Adór do'wí úr kura tleéhh a ga/eéra? Tlaa/anoó gawaá kuqí meét i kaahh oo ta fee/iiká.”

Iimu/úngw slahha'amu

³ Tam qoomár Yesu iwa iwiít gawaá tloomár xaaikaari ta babay Miseituni, iwa amór Doó Mungú i xuumiisi, Petro nee Yakobo nee Yohana nee Andrea tawa kilooín, kuri yaahaás kway báy,

⁴ “Atén i ooang, kangwsíng i tleehharuuti a xaylá, nee layár ta ari a umós, qoomár kaangwí birna tseewúy?”

⁵ Yesu alki/ituuwo gari iimu/ún dir'ín i ale gídaabá, “Ti harmagahhe', hee munduwa al/aáy.

⁶ Múk yaariír ni hardah tiwa ateetin ar umuueé', tawa kaahi, ‘Aníng a Kristo.’ Ala inooín múk yaariír ku al/aay.

⁷ Kuungá' iidíguú slaqwara bura axasé', nee tsimaahhír slaqwara, ma da'ayuutara', asma tí niqo hardát geerí alé, ala alhhe'eesaay aa xayká.

⁸ Asma xooro i slaqwarár eér amór xoororqá', nee waawutmoó xooro i slaqwarár áy amór waawutmoó xoorór hatlá'. Yaamaá yaarire kunseeli i ti'ít, slám giyeét ni tleér. Tí sleémeero an iimu/úngw slahha'amu.

⁹ “Kuungá' ti harmagahhe' asma tundu huwahuuw baraá maraá tawa múk sakwasleemuuti, nee baraá maraá saaliingo tundu muux. Kuungá' sleeme tundu huwahuuw dír mukduú kwasleemár múk tlaáq, nee geerá waawitá asma aníng, as iwa lamabu'uunda' dir'ín i ale.

¹⁰ Ala Ya/abtór hho' aqo kan geerí alki/iit baraá xoordu sleémeero deelór alhhe'eesaay niwa hardata.

¹¹ Nee kuungá' burtunda uhín, tunday huúw as tunduwa sakwasleemuuti, gár ta ooa' ma geerí leelehhiitara', ala tidá' siiwadaádae tindi haniisi na ooaak. Asma heé axweés qoomaadaádae a kuunganeeká, a Qeeruú hhoohhoó'.

¹² Nee hhiya' hhiyaawós gu sakii/ kuwa gaasi, nee baabá na/aywós gu sakii/, na/'ii nee xwaylitér'ín ti dakusiyá' sleeme, xwaylité kay tsuu/.

¹³ Kuungá' tundu aahh nee muu sleémeero asma aníng. Ala heé aa qiitl ay alhhe'eesaay an kudá' ba/ám.”

Slahha'amkú úr

¹⁴ “Kudá' tlaákw oo Hhiturusmo bura aandé', aa sihhiít didaádá' iwa harinaká” (heé soomuús gídaabárós ngi tsaahhi), “qoomaadae múk yaamaá Yudeár i dirií' ta ta'ain gawaá tlom'i.

¹⁵ Heé gawaá doó i dirií' miwa aweér as gár baraá do' ngiwa leehhi,

¹⁶ nee heé baraá qaymór i dirií' miwa kií/ iwa tlabaawós leehhi.

¹⁷ Ala /ameenár tsiihaawe nee ar na/'aá ninakw gi koom qoomaadae, a tsaxwa dir'ine kaangwí nguwa wa /akuutiya'.

¹⁸ Firiiriimé' ala kaangwí mindiwa ti'iít qoomár tluwoó úr i alé.

¹⁹ Asma slahha'amkwá deeloodá' ku úr adór taa baloó ariiká baraá yaamuuwo iimír iimu/uumaro Mungú yaamu ngiwa tleéhh ay laarí, slám i baloó ki/iiká slahha'amkwá adór kwí ki/isaro.

²⁰ Ala Aako bar deeloorí gaa /aareesiiká geeraawo, heé geeraawo ba/ám i kaahh. Ala inós deeloodá' gana /aareés as mukdá' inós aa tsawaár.

²¹ “Nee qoomaadae heeko burna báy, ‘Kristo areengw i diirí,’ laqaá bira oó', ‘I amorqá',’ ma ya/aamara'.

²² Asma múk ni ti'iít i deer oo káh, ‘Aníng a Kristo,’ nee kookoo i kaahi, ‘Aníng a aarusmo,’ ala a loeká. Inooín laya ka tleehh, nee muruú waa/oo/amo, as múk yaariír kuwa al/ayi, barnaxes ka aleesláy kiwa al/ayi tam kudá' Mungú aa tsawaár.

²³ Ala kuungá' ti harmagahhe', asma án kuungá' naa gurbuú' geerí ale mura' sleémeerowo.”

Hardahamuú Garmoó Hee

²⁴ “Ala deeloodaádae alaá slahha'amko looa i gíp, nee slahhaangw i gwa/aatiiká.

²⁵ Tsatse/uú gawaá doori i paahh, nee /uuruudá' doori gi koóm ku dingiís.

²⁶ An qoomaadá' Garmoó Hee kuwa ari niwa hardihi ar hunkáy, ar /uuruú úr nee xirif,

²⁷ nee malayke ngiwa ya/aawi, mukós kudá' aa tsawaár kuwa burumbuuri umuúqo diiro baraá yaamuuwo, /uwa nee da/aawe, /iiya nee basko.”

Intsaahhatisár slaqsoó ti'ita

²⁸ “Slaqsoó ti'ita nu intsaahhatisi. Qoomár loo/orós bira páhh, ar /aben nay harmá/, a xuá' gídaabá tluwaay naa tseewúy.

²⁹ Nee kuungá' sleeme muruuwí bura aandé' naxes naa iimu/ún, tsaahhaagáy ar gídaabá qoomár alhhe'eesaay aa xeér.

³⁰ Án a kah, muruuwí sleémeero i boo/ dír mukú de'eemaaká' ir kumiiti.

³¹ Doori nee yaamu i waarahhiyá', ala axweesante'eé' i waarahhká baloó ale.”

Siiwarós nee baalaaro heé ga xuú' i kaahh

³² “Ala iidíguú siiwadá' nee baalaarós heé gu xuú' i kaahh, tam malaykér gawaá doori, tam Garma, aqo har Baabá.

³³ Dalaaé' ti harmagahhe', asma qoomár siiwadá' niwa hardat a xua'aaká.

³⁴ Slaqsaywós a adór heé aa aa'aá kay, oo do'ós gwa dír lawaaleerós i geexay, nee umuúqo heewo gwa gadiyeérós i haniís. Heé afkuú doó xuúm guri hara'ayín do' nguwa xun.

³⁵ Gimsé', ti harmagahhe', asma a xua'aaká qoomár heé do' loó' niwa hardihi, tam tsiindo, tam amsi, tam ságw loaytleemu, tam matlatle.

³⁶ Ti harmagahhe' munduwa hhaawiís nuwa gu'utér i ay.

³⁷ Nee tí naa kuungá' i káh ar gídaabá ti harmagahhe', an káh sleeme dír muu sleémeerowo.”