Marko 10 - Ya/abtór hho' 1977

Yesu i kángw talaákár intsaahhatimis

¹ Didaádane iri tláy iri hardáh yaamaá Yudea ay gayuú Yordani. Boo/oó yaariír guri i burumburiít malé alé, giri intsaahhatimís adoodá' /iisí i /imamiisi.

² Múk Farisayo guri yaahastá áy ar iiara, tari oó', “A hariímaáro hee hareerós ngiwa talaákár i haniisi?”

³ Giri báy, “Gár Musa naa hara'ayín dirhunge a milá?”

⁴ Tari oó', “Musa ya/aama gana haniís ar hee hareerós ngiwa talaákár i haniisi.”

⁵ Yesu giri báy, “Gár hara'ayasíng ngisa gooín a asma munerhúng kawa gawdén.

⁶ Ala iimír iimu/uungo Mungú yaamu ngiwa tleéhh, hhawaata nee /ameeni gina tleéhh.

⁷ Gawaá adoorihe, hee baabuúwós nee aayoorós gin geexáy tiri haragwaaiyá' nee hareerós.

⁸ Kukaáká' tsár tari wák tleehhiít. Daxta kuká' tsár a sangw tsareeká, a adór heé wák.

⁹ Ala bar adoorí, kuká' Mungú aa haragaás hee mingiwa paraátl.”

¹⁰ Tawa amór doó i waátl eeharuuseerós axweesantadá' gari yaahás.

¹¹ Giri báy, “Umuúqo heewo oo hareerós gaa guus, iri harér hatlá' duúx, hareerós gaa sadakuús as fuqi.

¹² Nee hare hhawaatuuwós burngwa geexeér, iri duuxór eér dír heé hatlá', inos aa fuqús.”

Yesu na/'ii ngiwa tsuúq

¹³ Na/'aá ninakw kina amoorós i huúw ngiwa kwatimiiti. Eeharuuseerós mukdá' na/'aá koóm guri iigahhát.

¹⁴ Yesu adoodá' ngiwa ár, iri ló'wa buúhh, giri báy, “Na/'aá ninakw mawaagáy i amor'eé' hardihiye', mi ila/aamara'. Asma awa adór kuká' waawuti'iimár Mungú a tooín.

¹⁵ Án a kah, heé waawuti'iimár Mungú gaa ya/aniká adór na/oó niinár ale, i dahiiká baraá waawuti'iimarihe.”

¹⁶ Yesu na/'iidá' giri slaqwtós i óh, giri dabaawós i qaás, giri tsuúq.

Masoomoó daqaarmo

¹⁷ Qoomár iwa baraá aaí tlatlay, heé wák guna i daqáy ar gaanslaay guri i tumbarara'aát, guri yaahaás, “Intsaahhatusmoó hhoó', adór ni laaq ar slafíngw alhhe'eesay wásl ngur aal?”

¹⁸ Yesu guri báy, “Mis hhooeemár ateetiín? Heé hhoó' i kaahh, aqo har Mungú kilós.

¹⁹ Ahaá baré hara'aya a xú', ‘Hee muu gaasaar, Ma fuquusaar, Ma fisisiimaar, Lamabu'úngw lama ma kaahaar, Ma al/agiimaar, Baabuúwók nee aayo ilaiwawa/eek.’”

²⁰ Iri oó', “Intsaahhatusúmo, tisíng aga boo/eés sleémeero iimír na/u'uumar'eé' wa ale.”

²¹ Yesu guri i qaytsiít, guri slaá', guri báy, “Gár wák uga wa /aaruúr. Tláw, muruudá' ta koon weeriseek sleémeero, ku narkuutér i hanmís. Tók ar yaariir a gawaá doorí eér. Bara hhe'és, na hardát, aníng ir eehát.”

²² Ala inós iri boo/áy as adoodá' Yesu ngwa báy, iri tláy ar gurhaami, asma inós a daqaarmo ló'wa ale.

²³ Yesu yaamu sleémeero giri xuuxuú', eeharuuseerós gari báy, “Ga/aawaak adór kar gawít múk daqaare tawa dahi baraá waawuti'iimár Mungú.”

²⁴ Eeharuuseerós axweesantós gari waa/oo/amór wa aán. Yesu giri malé i ilawaáts, giri báy, “Muk'eé', ga/aawaak dahmaá baraá waawuti'iimár Mungú idór kir gawít.

²⁵ Angamía iwa dat ar baraá fooxár laqwa, ka inslaahh ta daqaarmo iwa baraá waawuti'iimár Mungú i dahi.”

²⁶ Inooín tari ló'wa waa/oó/, kuri báy, “Ala heé ba/ama ga aleesláw a heemá adoosinge?”

²⁷ Yesu giri i qaytsiít iri oó', “Dír muko aleesleemuuwós i kaahh, ala dír Munguhe a adoosingeeká, asma dír Munguhe umuúqo gaaro i ya/aán.”

²⁸ Petro Yesu guri báy, “Ga/aaweegáy hamí, atén muruurén sleémeero ugwa geexawaán, kuúng uri eeharaán.”

²⁹ Yesu iri oó', “Án a kah, umuúqo heewo oo dooín ngwa geexay, laqaá hhaeewós, laqaá aayo, laqaá baabá, laqaá na/'ii, laqaá qamu, as aníng nee as Ya/abtór hho',

³⁰ inós tí sleémeero hám baraá yaamuukae ga sláy sagaáwa tsiiruú wa ale, maraay nee hhae, nee amu, nee na/'ii, nee qamu, inós tumku slahhe'eemisi. Aluuwo baraá yaamaá hatlae slafíngw alhhe'eesoó koomaaká gu sláy malé alé.

³¹ Ala awa yaariir kudá' geerá hará' ta alhhe'eesáy kii/, nee kudá' alaá hará' ta geerí waaraahh.”

Yesu gwa'araarós ngaa geerí oó' malé alé sagaáwa tame

³² Tawa tsa/a/an Yerusalemú i alé, Yesu gina geerahaár loohiro. Eeharuuse gari waa/oo/amór wa aán, nee mukdá' nee inooín ti al koomá' tari da'ayuút. Eeharuuseedá' mibá nee tsár gari ateét, adór inós ku laqi nee muu gari dir'ín i oó'.

³³ Giri báy, “Ga/aawaagáy hamí a tsa/a/amán tawa Yerusalemú kawaan, nee Garmoó Hee ku qaas gawaá dabaá geeraharuusér uren ar saalíngw múk Yahudi nee intsaahhatuusér hara'ayár Musa. Inooín ku sakwasleemuut as kuwa gaasi. Sakwasleemaro burkwa hhe'eés kway haniis amór múk xoordu.

³⁴ Inooín kway niqín, kway i tsuuqún, kway muux ar qaw'i, kway gaas. Deelór tám bira waaráhh nay waaslee/.”

Firór Yakobo nee Yohana

³⁵ Yakobo nee Yohana, daaqoó Sebedayo, kuri i daqáy kuri báy, “Intsaahhatusúmo, gár ta dirók i firór wa sla'aan i deer, xá ya/ameek.”

³⁶ Giri báy, “Gár ta sla'a' ar ni tleehh a milá?”

³⁷ Kuri báy, “Atén ti ya/aan tawa al iwiitaan nee kuúng baraá xirfuuwoge, heeko dakók oo doó /iyáy, kuqá' dakók oo doó basáy.”

³⁸ Yesu giri báy, “Gár ta firiiriinda' a xua'aaká. Slahha'amkwá án ni slaw kuungá' u qitlá'a sleemuuwo? Laqaá didaádá' aníng ti dahaasi kuungá' idahamawo a qitlá'a?”

³⁹ Kuri báy, “Adoosíng a aleeslawaán.” Yesu giri báy, “Slahha'amkwá án ni slaw, u sleerá', nee slahha'amkwá án ti dahaasi, kuungá' tundu dahaas.

⁴⁰ Ala kángw kuungá' tawa iwita' heeqá' dakw'eé' oo doó /iyáy, kuqá' dakw'eé' oo doó basáy, kangwsíng a kwe'eeneeká. Heé kangwsíng a Mungú. Mungú kiteeriidá' gi haniis dír mukdá' ngisa amohhe'eés.”

⁴¹ Eeharuuseedár hatlá' mibaangw kaangwí nguwa axás, Yakobo nee Yohana kiri i buúhh.

⁴² Yesu giri ateét giri báy, “A xuá' mukduú adór waawituú urén baraá múk xoorduwo tan waawuti'ii'ín ar /uuru, nee inooínadá' uren muu nguwa baliitiya'.

⁴³ Ala kuungane a adooriheeká. Heé uraay gu slaá' baraahunge, gár kuwa hariím a kuungá' nun sagadiyuus.

⁴⁴ Nee hee baraahunge oo gadiyér kuungá' nuwa geeraharahari ga slaá', gár kuwa hariím in lawaalmoohúng tleehhiit.

⁴⁵ Asma Garmoó Hee inós naa hardihiiká as inós kuwa sagadiyuusi, nina hardáh muu nguwa sagadiyuusi, nee iwa gwaai as múk yaariír nguwa gweeri.”

Bartimayo kuwa qaytsitís

⁴⁶ Tari hardáh Yeriko. Inós nee eeharuuseerós tari malé tláy Yerikó wa ale, dinkwa nee boo/oó úr oo muu. Bartimayo, garmoó Timayo, kuna afaá loohír i áy, i iwiwiit. Inós an kudaáduú taampa oo múk firaariím.

⁴⁷ Inós ngiwa axaás gídaabá a Yesú Nasareti in waaraahh, tseeo gari iimu/ún i kaahi, “Yésu, Garmoó Daudi, án gurtlawáng.”

⁴⁸ Múk yaariír guna iigahhamiít as iwa xasliiti, ala inós tseeoro iri ak buúhh, “Garmoó Daudi, án gurtlawáng.”

⁴⁹ Yesu iri sihhiít iri oó', “Ateetare'.” Heedaáduú taampa kuri ateét, kuri báy, “Dae maweek, sihhiitáng, Yesu u ateetín.”

⁵⁰ Inqwaarirós gari amorqá' i kwaáhh, iri tláy ar gaanslaay amór Yesu.

⁵¹ Yesu guri báy, “Adór ta sla' ar u laaq a adoomá?” Heedaáduú taampa iri oó', “Intsaahhatusmooeé', gár ni slaa' a ilaaeé' niwa qaytsitiya'.”

⁵² Yesu guri báy, “Tláw gimáy, haratlintaaoorók ugwa hungu/ús.” Hamtidár kilae ilaawós nay qaytsitiyé', nee Yesu tari koné'.