Marko 1 - Ya/abtór hho' 1977

Alki/ituú Yohánudá' Baatimaamiís

¹ Gaarí a iimu/úngw Ya/abtór hho' daanduú Yesu Kristo, Garmoó Mungú.

² Asma baraá kitaábuú aarusmo Isayuwo kaa gooín gídaabá, “Ga/aaweek, ya/abusmooeé' u ya/aáw geeraawók wa ale, oo loohirók ga amohhe'eés.

³ Afór hee iiár i qaasaak ar tseeamiim baraá darmuú wa ale, ar kah, ‘Loohír Aako amohhe'eesaak, nee waarahhmawós gan'aasaak.’”

⁴ Ala Yohana iri ti'iít, iri baatimiís baraá darmuú wa ale. Iri alki/iít iri oó', “Hhu'u'umé' tundu baatimiisi as Mungú tlakweemaahúng ngiwa gurtlay.”

⁵ Xoorór yaamaá Yudea sleémeero nee múk Yerusalemu sleémeero kuri i daqáy, kiri baatimiís baraá yaaér Yordanír wa ale, tlakweemaaín kiwa hhu'u'ún.

⁶ Nee Yohana tsitaywós a tsitoó taa tleéhh ar se'éngw angamía, nee afeetloowós a himú kaahari, nee muruú /aymaarós a iingigi nee danú sla/a.

⁷ Iri alki/iít iri káh, “Heé aleesleemuú koóm oo án i baá/ ni hardah aluueé' wa ale. Tam aníng a hariimaaká niwa xupuu' as him'ér ya/ataawós ngiwa slakwekwe'ees.

⁸ Aníng nuna baatimiís ar ma'aay, ala inós nu baatimiis ar Qeeruú hhoohhoó'.”

Yesu kuwa baatiís

⁹ De'emaadaádane Yesu iri hardáh, i amór gixsár Nasaretír daahh, ar baraá Galilaya, kuri baatiís nee Yohana baraá yaaér Yordanír wa ale.

¹⁰ Hamtidár kilá' iwa ti'iít baraá ma'aywo, doori gina ár naa gweeritiyé', nee Qeeruú hhoohhoó' i awdiit gawaawós i alé adór hhooki.

¹¹ Afoo nay gawaá doorí wa ilawáts, i kat, “Kuúng a Garmaaeé', sla'aarusmooeé', oo aníng iga qwal/atis.”

Yesu kuwa iiara'ár

¹² Hamtidá' Yesu kuri huúw nee Qeeruú hhoohhoó' baraá darmuú i alé.

¹³ Ina hoót baraá darmuú wa ale deelo mibeeri tsiyáhh, kuna iiara'ár nee Neetlaangw, inós i dinkwa nee makaá sla/a, nee malayke guna sagadiyús.

Iimu/úngw gadiyér Yesu Galilayaro

¹⁴ Tam alaá Yohana kuwa tseék, Yesu iri daqáy baraá Galilaya, Ya/abtór hho' ar Mungú gari alki/iít,

¹⁵ iri káh, “Qooma aa bó/, nee waawuti'iimár Mungú naa tseewuúr. Hhu'u'umé' nee Ya/abtór hho' haratlintiaagáy.”

Ohuusér tsiyáhh ar siyó kawa ateét

¹⁶ Yesu iwa waaraahhi dír afaá tlawtá Galilayaro, Simoni guna ár, nee Andrea hhiyaawós, ta baratsufoó kwakwaahh baraá tlawi, asma tawa ohuusér siyó.

¹⁷ Yesu giri báy, “Qwalaasé', án eehararé', án kuungá' nu intsaahhatís adór muu ngur amor'eé' huwahuba'.”

¹⁸ Hamtidá' baratsufay'ín kuri máy, kuri eehaár.

¹⁹ Iwa geerí kumiít gár niinawe. Yakobó Sebedayo nee Yohana hhiyaawós giri ár. Inooín sleeme ta baraá miringamo, ta baratsufay'ín amohhe'eemiis.

²⁰ Hamtidár kilá' giri ateét, baabuúín Sebedayo kuri geexáy baraá miringamo dinkwa nee múk slaqwe, tari daqáy kuri eehaár.

Heé neetlaame aa eér

²¹ Tari tláy ay Kapernaumu, nee hamtidae bál deelór hungu/umaawo iri dáh baraá doó saaliingw, iri intsaahhatimís.

²² Tari waa/oó/ intsaahhatimisuuwose, asma gina intsaahhatimís adór heé hara'ayár koóm, aa intsaahhatimisiiká adór intsaahhatuusér hara'ayár Musa.

²³ Qoomaadae baraá doó saalingw'ine heeko i deer oo neetlaame aa eér, iri tseé',

²⁴ iri oó', “Atén nee kuúng a milá, Yesú Nasareti? Ahaá, nina hardáti as atén tiwa qwaares? Án kuú xuú' adór tar heemá, Kudá' Hhoohhoó' oo Mungú.”

²⁵ Yesu neetlaameedá' gari iigahhaát iri oó', “Xasliité', ti'iité'.”

²⁶ Neetlaameedá' hee guri pungahhamuúr, iri tsé' ar afór ur, guri geemeér.

²⁷ Tari ló'wa waa/oó/ sleémeero, tam tiri yaahamisiyé' tari káh, “Gár adoorí a milá? A intsaahhasár /abéne? Ahaá baré ar aleesleemuwo tam neetlaame gan hara'ayiyín, inós gway iwawá/.”

²⁸ Iidíguuwós ina tsiyaayaaxaát hamtidár kilá' umuúqo diiro baraá yaamu sleémeero awa bihhér Galilaya.

Yesu aayór harér Petro ngiwa hungu/uús

²⁹ Nee tawa ti'iít baraá doó saaliingo, tari hardáh dír doó Simoni nee Andrea, dinkwa nee Yakobo nee Yohana.

³⁰ Naxés aayór harér Simoni i gawaá qatani, ga/atani gaa ót, nee iidíguuwós kuri oó' dír Yesu.

³¹ Gari i tseewúy gari dawa óh gari tleés, ga/atanto iri hungú/, giri sagadiyús.

Múk yaariír oo Yesu aa hungu/umiís tsiindoowo

³² Qoomár tsiindo looa iwa dát, kuna múk yaariír i huwahuúw oo tiqtuuse nee oo neetlaamér koóm.

³³ Nee múk gixsa sleémeero ina burumburiít afkuú doó i ale.

³⁴ Múk yaariír oo tiqtír dimbadimbé ga koóm guri hungu/umiís, neetlaamér yaariir gari hingeemiís, sleeme neetlaame gaa mayká iwa axwes, asma gwa xú'.

Yesu i Ya/abtór hho' alki/ituú áy

³⁵ Nee matlatlér boo/e iri tláy iri ti'iít ay dír muu iwa kahhi, iri firín didaádá' wa ale.

³⁶ Simoni nee kudá' ti al koomá' kway leelehhiít.

³⁷ Inooín kuwa sláy kuri báy, “Muu sleémeero i kuúng leelehhiit.”

³⁸ Inós giri báy, “Qwalaasé' amór hatlá', amór gixsadaá tsewen, as Ya/abtór hho' ngiwa alki/iit amorqane sleeme, asma gaarí an gár aníng nisa hardáh.”

³⁹ Iri daqáy baraá ayaá Galilaya sleémeero, iri alki/iít baraá maray'ín awa saaliingo, nee neetlaame gari hingeemiís.

Yesu heé tiqtír tsatimit nguwa hungu/uús

⁴⁰ Heé tiqtír tsatmit ina hardáh dirós, guri i tumbarara'aát, guri firiirín iri oó', “Kuúng bar slá', án i aleesleér iwa hhehhe'es.”

⁴¹ Guri gurtláy, guri dakós i gan'aás guri kwatiít guri báy, “Án a slaá', hhoohhooúw.”

⁴² Nee hamtidá' tiqtirós tidár tsatmit iri qútl, inós iri hunguú/.

⁴³ Guri hara'ayín kángw kilá' wa ale, guri quutliís hamtidár kilá',

⁴⁴ guri báy, “Ga/aaweek, hee mu /aymuú bawaar, ala tláw ti laqaan dír geeraharusmoó saalíngw múk Yahudi. Muruudá' Musa aa hara'ayín haniiseek asma hungu/umaawók, as tí iwa lamabu'uungw tleehhit amor'ine.”

⁴⁵ Ala heedá' iri ti'iít, iidíguudá' guri alki/iít ar axweesanoó yaariír, nee guri tsiyaayaaxán, tam Yesu pa/aangw gwa slayká oo iwa dahi baraá gixsa ar geehhooeema. Ala iri tsee/aá wa iwiwiít dír muu iwa kahhi, nee umuúqo diiro kuri i daqaqáy.