2 Yohana 1 - Ya/abtór hho' 1977

¹ Anínguú Aako barwaárí ngina amoorók i gooiím, kiíng, aáyo, kiídá' taa tsawaár, nee amór na/'iiwók, kudá' naa slaá' ar baraá looeema. Heé nu slaá' a aníng kilooeeneeká, tam awa hatlá' sleémeero kudá' looeema ngi xuá' sleeme nu slaiyá'.

² Asma looeemaaká' baraatén i diriiá', slám alhhe'eesay'ín i kaahh, aqo nee atén an alhotaatimaán.

³ Mungú Baabá nee Garmaawós Yesu Kristo atén ti tsuuqi, nee ti gurtlay, nee ti waydí haniisi ar baraá looeema nee sla'aari.

Looeema nee sla'aari

⁴ Ana qwalaá/ ló'wa ale asma na/'iiwók bahh'ale i baraá looeemaá i dirii'iyá', adoodá' Baabá tira hara'ayín.

⁵ Aáyo, daxta i firiím, a gídaabaheeká in hara'ayár /abén i haniís, aqo tidá' ta qaroó koomaan iimír iimu/úngw wa ale, tidá' kah gídaabá ti sla'asla'ané'.

⁶ Sla'aari a tí, “Ta hootaán ar adoodá' Mungú tira hara'ayín. Tí an tidá' tinda hara'ayín, adoodá' kara axasé' qaroó alé iimír iimu/uungo gídaabá, ‘Hooté' baraá sla'aarír wa ale.’”

⁷ Al/aymuusér yaariir asma naa ti'ít baraá yaamuuwo, ar kah, Yesu Kristo a slaqwa tleehhiitiiká. Kwí an kuduú al/aymusmo, nee Wakusmoó Kristo.

⁸ Kuungá' ti harmagahhe', gadiyérhúng tidá' taa tlehhé' bu'utuuwós miwa qwaár, as kahhoó' kuungá' bu'utuudá' hariím kuwa adá wa sleera'.

⁹ Heé baraá intsaahhasár Kristó wa kumiitaaká, ala iri harwaaraáhh, heé adoorí Mungú baraawose i kaahh. Ala heé baraá intsaahhatisár Kristó wa kumaamiít, kwí Baabá gu kón nee Garmaawo.

¹⁰ Hee birna amorhúng káy, inós bar intsaahhastí ngi amorhúng i huwahuwiiká, mu dahi'isaara', nee mu taaqweesara' sleeme.

¹¹ Asma heé gu taaqweemiís, a kudá' tlehhemi'iiwós kudá' tlakw gi tlehhiít.

Axweesanoó alhhe'eesaay

¹² Muruú yaariír oo ni ooár wa slaa' i deer, ala nguwa gawaá barwár i gooiim ar wiíno u sla'aaká. Gár ni slaa' a nin amorhúng i hardáh, nuri i axweés ar afa, asma qwal/amaayeerén iwa bo/.

¹³ Na/'aá hho'oorók tidá' taa tsawaár i intsihhiimisyá'.