Titus 3 - Iñupiatun Mumiksat Uqalugiksuat

Ukpiqtuam Iñuusiksraŋa

¹ Itqaqtitkich ukpiqtuat kamakkutiqaqulugich atanauranun ataniġnaqusiraqtuanullu, kamagitqulugich itqanaitqulugich qanusipayaamun nakuuruamun savaamun.

² Iḷisautikkich uqautikłiquŋiḷḷugich pigiitchuamik iñulimaakun, qanaaqsaiḷitqulugich, piaqłuktaquŋiḷḷugich, suli taluġnairrutilugich iñupayaat.

³ Qanuqtauq uvagut qaŋauvlugu isumalluaġiiñŋagaluaġmiruaguut, kamasuutaił̣ł̣utalu killukuaŋavlutalu suli maliġuaġuuŋavlugich qanusiḷimaat pisuutivut, aliasuŋisaaġutillu qanusiḷimaat, atuqługich iñuutchivut uumisuunmi killuqsraunmiḷu, iñuich uumigivluta uvaguttauq uumigivlugich.

⁴ Tavra God-im Annaurripta salapqiqamiuŋ nakuutini piviuttaqqutiniḷu uvaptiŋnun,

⁵ ilaan annautiŋagaatigut, pisigiŋitkaluaŋŋaan uvagut nakuurualiqiniḷuta, aglaan pisigigiññaqługu ilaan nagliktuutini. Ilaan annautiŋagaatigut anitqiksiłłuta piḷuutiptiŋniñ salummaqłuta, aasii Ilitqusiġiksuamun iñuupkallasipkaqłuta nutauruakun iñuutchikun.

⁶ Qanuq God-im aitchuqpaŋagaatigut Ilitqusiġiksuamiñik Jesus Christ-kuaqługu Annaurriptigun,

⁷ nalaunŋasirautquvluta sivuqqamiñi. Tainna pikami ilaa naglikkutiqpaqaŋaruq uvagut kiŋuvaannallasivḷuta iñuggunmik isuitchuamik paŋmapak niġiugikkaptiŋnik.

⁸ Kipiġniuġutigigikpiñ katchuŋaitquvlutin tamatkua uqautigigupkich, ukpilianiŋaruat God-mun kipiġniuġumaut savaaqaġuglutiŋ savaaġiksuanik, tamatkua nakuupiallaktut anniqsuutaupiallaktullu iñuŋnun.

⁹ Aglaan pitchaiḷiḷugich isumalluaġiirrutikun uqavaaġutit, atisalaŋiḷḷu maŋŋuuruat, atiŋirrutit qanaaġutillu pitquratigun qaisauruatigun Moses-kun, qanuq tamatkua atiŋirrutit anniqsuutauŋitchut, sivuniksraqaġnaitchullu.

¹⁰ Aasiiḷi iñuk atiŋirrutauruaq, siḷġiqsuġaluaġupku atausiaġlugu naagga malġuŋni, iḷaksiatqigñagu,

¹¹ iḷisimalugu tainnasiq iñuk killunmuŋaruq, piḷuusiqirauruġlu, inmiñik suksraunġiqsuq.

Aqulliich Iḷisaurrutit

¹² Tiligupku iliŋnun Artemas naagga Tychicus, pisuqtilaaqtun qaisaġniaġumautin uvamnun Nicopolis-mi, qanuq sivunniŋaruŋa ukiisukłuŋa tavrani.

¹³ Pisuqtilaaġumautin ikayuġuglugik Zenas-lu pitquraliqiri, Apollos-lu iglauniksraŋaŋni, upaluŋaiyammaġiksaaġlugik sumik inuaŋayumiñaiġḷugik.

¹⁴ Suli iñuvut iḷitchiyumaut savaaqaġuglutiŋ savaaġiksuanik, piqaqtitchiḷutiŋ piiḷḷiupiaġataqtuanik anniqsuutauŋitchuanik iñuusiqaŋitchumaut.

¹⁵ Iluqaġmiŋ nayuutiruat uvamnun paġlagaatin. Paġlatisigut tamatkunuŋa ukpiqtuaġuqatiptiŋnun. God nagliktuutiqpaqaġli iluqavsiññun.