Titus 2 - Iñupiatun Mumiksat Uqalugiksuat

Nalaunŋaruat Iḷisaurrutit

¹ Aglaalli ilivich, iḷisaurriiñ nalaunŋaruamik iḷisaurrunmik.

² Iḷisautikkich utuqqanaaġuqtuat aŋutit qaaŋiulaaŋasitquŋiḷḷugich, kinnaksaqtuagutquŋiḷḷugich, inmiŋnik aŋalalluataqulugich, nalaunŋaruamik ukpiġutiqaġlutiŋ, piviuttaqqutiqaġlutiglu, suli nikatchaŋiḷḷutiŋ.

³ Tainnatun suli utuqqanaaġuqtuat aġnat iḷisautikkich iñuusiqaqulugich piḷuutaitchuanik, tiġliraqłiŋaiġḷutiŋ imiŋasiraġaŋaiġḷutiglu. Iḷisaurrutigiraksraġigaich sut nakuuruat,

⁴ ayuġaksautigilugich niviaqsianun piviuttaġitqulugich uiŋich miqłiqtuŋiḷḷu,

⁵ inmiŋnik aŋalalluataqulugich, piḷuutaitchuakun iñuutqulugiḷḷu, aimaaġviŋmik qaunaksriḷḷuataġlutiŋ, suli kamagilugich uisiŋ, God-im uqalua iñuich suuŋiḷaqsruŋitchumagaat.

⁶ Tainnatuttauq kiaqsrukkich nukatpiat inmiŋnik aŋalalluataqulugich.

⁷ Iliviḷḷiasii qanusipayaatigun savaaġiksuatigun tuvraaksriiruksraurutin. Iḷisaurriguvich pimmaġiksaapiaġlutin.

⁸ Uqaluqaġlutin naġġuksruġnaġumiñaitchuamik, akiḷḷiḷiqsuqtitin kanŋutchaktitauyumaut, sumik pigiitchuamik uqaksraiḷḷutiŋ uvaptigun.

⁹ Iḷisautikkich kivgat kamagitqulugich ataniŋich suli iviġagniaqulugich supayaatigun. Kiummatiqaqtuksrauŋitchut ataniġmiŋnun,

¹⁰ naaggaunnii tigligaġvigiŋaiġḷugich. Aglaan iḷisimanaqtuksraurut ataramik nakuutilaamiŋnik ukpiġnaqtilaamiŋniglu, uqautigilluataġumagaich iḷisaurrutit God-ikun Annaurriptigun iluqaisigun piramikkun.

¹¹ Qanuq God-im annaurrisaa nagliktuutiqpaŋmigun iḷisimanaqsiŋaruq iñupayaanun.

¹² Aasii taavrumuuna nagliktuutiqpaŋmigun ilaan iḷisautigaatigut iñuusiqaŋaiquvluta god-aiḷaġluta kipiġniuġutigiŋaiġḷugiḷḷu pigiitchuat, aglaan iñuutquvluta aŋalalluataġluta uvaptiŋnun, nalaunŋaruakullu god-iliqiruaguluta mattumani iñuutchimi,

¹³ utaqqiŋŋapta niġiugivlugu quvianaqtuaq uvluq tikitchumaaqtuaq tautugviksrautikput qaumanġanik kamanaqtuam God-ipta Annaurriptalu Jesus Christ.

¹⁴ Tuquvluni aitchuutigiŋaruq inmiñik uvaptiŋnun atanniqsimaŋaiqsitchaqłuta iluqaanun pigiitchuamun, ilaaguaqsaqłuta ilaan iñugisukłuta, kipiġniuqtuaguut nakuurualiqisukłuta.

¹⁵ Iḷisautigikkich tamatkua, atuġlugu iluqaan ataniġnaqutin. Qapiŋaisaakkich suaglugiḷḷu naalaġniruat iliŋnik. Kialiqaa suuŋiḷaġiŋaiḷḷisin.