Titus 1 - Iñupiatun Mumiksat Uqalugiksuat

¹ Ukua tuyuutit qairut uvamniñ Paul-miñ, God-im kivgaŋaniñ, suli Jesus Christ tiliraunikun iḷitchitquraŋaniñ. God-im piksraqtaaġiŋagaaŋa aasii tilivḷuŋa ikayuquvlugich ilaan iñuksraqtaani, ukpiliquvlugich iḷisautilugich iḷumun ittuanik uqaluŋmiñik iñuupkaiḷḷaruanik god-iliqinikun

² iñuuyumaliquvlugich isuitchuamun. God-im suuramikunnii saglulaitchuam unniqsuqłiiŋagaatigut taavrumiŋa iñuggunmik nunaunnii isagutiŋaiñŋaan,

³ aasii piviksraq nalautinman taamna salapqiŋagaa tusaayugaaġiksuatigun uqaluŋmigun. Tamatkua tusaayugaaġiksuat qaisauŋarut uvamnun aasii God-im annaurripta pitqutaatun uvamnun alġaqsruutigigitka.

⁴ Ukua tuyuutaurut Titus-mun, iġñipiaġataptun ittuamun qanuq atunim ittuamik ukpiġutiqaqłunuk. God-ttuq Aapa, Christ Jesus-lu Annaurrikput, naglikkutiqpaqaġli iliŋnun, tutqiutiqaqtillutillu.

Titus-gum Savaaŋa Crete-mi

⁵ Qimaŋagikpiñ Crete-mun, iłuaqsruquvlugich sut iłuaqsrugaksrauruat taamani, suli nalunaiqsitquvlusi umialiŋnanik nunaaqqipayaani. Itqaumalugich iḷisaurrutitka.

⁶ Umialiŋnaq pasiñaġumiñaitchuksrauruq, atautchimik nuliaqaġluni, miqłiqtuqaġluni ukpiqtuaguruanik, uqautikkusiaqaŋitchuanik pialasuuniḷugich kamasulaiññiḷugiḷḷu.

⁷ Qanuq umialiŋnaq qaunaksrauruq God-mun savaanik, pasiñaqtuksrauŋitchuq. Isumamisun piruksrauŋitchuq naaggaunnii piavsayaruksrauŋitchuq naagga taaŋŋaqtauluni naagga anayaitchuaguluni naagga piḷḷaturuaguluni.

⁸ Aglaan umialiŋnaq tukkuuruksrauruq, nakuurualiqillatuluniḷu aŋalalluataqtuksrauruq inmiñik, nalaunŋaruaguluni piḷuutaiḷḷuni qaaŋiulaaŋaŋiḷḷuni.

⁹ Umialiŋnam ukpiġipiagaksraġigai nayummatauluniḷu God-im iḷumun ittuat uqaluŋi iḷisausiaġiŋarani, iḷisaurriyumiñaġugluni allaniktauq iñuŋnik suli iḷisautilugich killukuaqtilaaŋannik tamatkua akiḷḷiḷiqsuisaaruat inmiñik.

¹⁰ Qanuq iñugiaktut kamasuutaitchuat iñuich sagluqinniktuallu taŋiġiḷanik uqaqłutiŋ, tamatkuałhaaq iḷisaurriruat nalunaiñŋutchiqsuksrauvlugu iñuk annaurrauniaqpan.

¹¹ Tainna uqaŋaiqsitaksraurut, qanuq maqutchirut tamatkiqł̣ugich qitunġaġiiñik iḷisaurrivḷutiŋ iḷisaurrutiksraġiŋisamiŋnik kanŋunaqtuakun sivuniġivlugu maniññaŋniaġniq.

¹² Iḷaŋat iliŋisa Cretan-miut nalautchaqtaat uqallaŋaruq, “Cretans ataramik saglusuurut, niġrułłuktun ittut, iqiasuuvlutiŋ niġġiqsunialgiñmiut.”

¹³ Taamna iḷaŋata uqallautaa iḷumun ittuq. Taamna pisigilugu suapiaġatakkich, nalaunŋasiyumaut ukpiġunmiŋni,

¹⁴ ukpiġiŋaiġḷugich Jew-guruat taŋiġiḷat unipkaaŋich, kamagiŋaiġḷugiḷḷu iñugruiññaich pitquraliaŋich ayyairuat iḷumun ittuamik.

¹⁵ Niqipayaurat piraġautchiḷḷu salumarut, akuqtuġnaġumiñaqtullu ukpiqtuaguruanun isummasiqaqtuanun nalaunŋaruamik God-itun, aglaalli sumik salumaruagitchuq tamatkunuŋa piḷuusiqirauruanun ukpiŋaitchuanullu, qanuq isumaqaġviŋich isumaŋiḷḷu salumaitchut piḷuktuaguvlutiŋ.

¹⁶ Iḷisimanigaluaġaat God, aglaan iñuuniaġusimiŋni naluruatun itkaat, naġġunapiaġataqtut kamasulaitchullu, nalliummatiŋitchut qanusipayaamun nakuuruamun.